საკე და ქართული ღვინო ერთ სივრცეში – დეგუსტაცია ტრადიციული სამზარეულოს თანხლებით


​ღვინის სალონ „8000 მოსავალში“, დეგუსტაციის საღამო – „საკე და ქართული ღვინო“ გაიმართა, სადაც წარმოდგენილი იყო ქართული და იაპონური ალკოჰოლური სასმელების ნაირსახეობები. ღვინის დეგუსტაცია ორი ქვეყნის ტრადიციული სამზარეულოს თანხლებით მიმდინარეობდა. პრეზენტაციის მსვლელობისას სტუმრებს შეეძლოთ ღვინისა და კერძების შედარება და ერთმანეთთან შეხამება.

ღონისძიების გამართვის იდეა იაპონიის საგანგებო და სრულუფლებიან ელჩს საქართველოში, ტადაჰარუ უეჰარას ეკუთვნის.

როგორც ელჩმა პრეზენტაციაზე სიტყვით გამოსვლისას განაცხადა, თავისი დიპლომატიური მისიის განმავლობაში ბევრი რამ ისწავლა და გაიგო საქართველოზე, ამდენად საელჩო ხელს შეუწყობს მსგავსი  კულტურული ღონისძიებების ჩატარებას, რათა ქართველმა ხალხმა უკეთ შეიგრძნონ იაპონელი ხალხის კულტურა.

“მე ვარ იაპონელი, მე ვამაყობ ჩვენი ქვეყნის ბუნებით, კულტურით და ხალხის აზროვნებით. იმავდროულად ბევრი რამ ვისწავლე და გავიგე საქართველოზე. ჩვენ გამოვიყენებთ ჩვენს ხელთ არსებულ ყველა რესურსს იმისათვის, რომ განვავითაროთ იაპონური კერძო ბიზნესი საქართველოში, თუ ეს მომგებიანი იქნება ორივე ქვეყნისთვის. ეს არის პირველი გაცნობითი ხასიათის ღონისძიება და მომავალშიც ჩვენ ვგეგმავთ მსგავსი ღონისძიების ჩატარებას ერთმანეთთან დაახლოებისთვის“, – განაცხადა უეჰარამ.

იაპონურმა მხარემ გამოხატა მზაობა, სურვილის შემთხვევაში, უზრუნველყოს იაპონური საკეს მიწოდება ქართულ ბაზარზე, რომელიც დღესდღეობით არ იყიდება საქართველოს სავაჭრო ობიექტებში.

საღამოს წამყვანმა, სომელიე ზაზა გრიგალაშვილმა, სტუმრებს უამბო ბრინჯის ძლიერი სასმელის შექმნის იაპონურ მეთოდზე და საკეს კლასიფიკაციაზე.
​მისივე თქმით, იაპონური საზოგადოება მჭიდროდ არის დაკავშირებული საკესთან. თავიდან ეს სასმელი განკუთვნილი იყო ღმერთებისთვის ბრინჯის ნაყოფიერი მოსავლის მისაღებად, მოგვიანებით კი იმპერატორის სასმელი გახდა. წარმოების გაფართოების შემდეგ საკე, ჩვეულებრივი ადამიანების ყოველდღიურ სასმელად იქცა. ხარისხის გაუმჯობესებასთან ერთად, საკეს რეალიზაციის ბაზარი მთელ მსოფლიოში ყოველდღიურად იზრდება.

პრეზენტაციაზე წარდგენილი იყო საკეს 9 სახეობა, რომლებიც წარმოებულია იაპონიის სხვადასხვა რეგიონში. საკეს ხარისხი დამოკიდებულია საკეს მოსავლის ხარისხზე. საკეს დასამზადებლად გამოიყენება განსაკუთრებული ჯიშის ბრინჯი, ასევე, განსაკუთრებული მნიშვნელობა აქვს წყალს. მის შემადგენლობაში უნდა იყოს კალიუმი, მაგნიუმი, ფოსფორი და კალციუმი, მაგრამ უნდა იყოს თავისუფალი რკინისგან და მარგანეცისგან.

იაპონიაში არის ცნობილი წყაროები – ჰიოგო, კიოტო, ფუკუსიმა, ტოიამა და ქიროსიმა. დამზადების ტექნოლოგია, ხშირად იწვევს 18–20 გრადუსის სიძლიერეს. მიუხედავად ამისა, ხშირად საკეში ჩასხმამდე ამატებენ წყალს და აზავებენ დაახლოებით 15 გრადუსამდე.

დეგუსტაციაზე წარმოდგენილი იყო საკეს ისეთი სახეობები, როგორიცაა საკე კოში ნო კანბაი, რომელიც დამზადებულია იაპონიის საკეს ყველაზე ფართომასშტაბიან მწარმოებელ რეგიონში, ნიიგატაში; ნანავარაი, რაც შვიდ სიცილს ნიშნავს; ნაგანოს პრეფექტურის ერთ-ერთი ყველაზე ცნობილი საკეს სახელწოდება იაპონური ცქრიალა ღვინო მიძუბაშიო, ასევე ნაბეშიმა, რომლის მოსამზადებლად უგემრიელეს ბრინჯს, ნიშიკის იყენებენ. მას ხშირად „საკეს ბრინჯის მეფეს“ უწოდებენ და სხვა.

ასევე წარმოდგენილ იქნა ალკოჰოლური სასმელების ერთ–ერთი სახეობა შიოჩუ, რომლის შესახებ არც თუ ბევრ უცხოელს სმენია. საკე ძალიან პოპულარულია საზღვარგარეთ, შიოჩუ კი უფრო მომხმარებადი დასალევია იაპონიაში. შიოჩუ შეიძლება დამზადდეს არა მარტო ბრინჯისგან, არამედ ტკბილი კარტოფილისგან, ხორბლისგან. მასში ალკოჰოლის შემცველობა 25-30% შეადგენს. გამორჩეული გემო არ ახასიათებს, ამიტომ მისი სხვადასხვანაირად მოხმარებაა შესაძლებელი.

ქართული ღვინოს დეგუსტაციის ნაწილს ანსამბლი „ქართული ხმები“, ხალხური სიმღერა „მრავალმჟამიერით“ აფორმებდნენ. პრეზენტაციაზე გამოიტანეს ქართული ღვინოების კლასიკური სახეობები: „წინანდალი“, რომელიც დამზადებულია ევროპული მეთოდით, და ქვევრის ღვინო „ქისი“, „ხვიხვი“, „მწვანე“ და „რქაწითელი“, და ასევე წითელი ღვინოები „საფერავი“ და „ოცხანური–საფერე“.

„ერთობლივი დეგუსტაციისთვის ღვინის შერჩევისას, ვეძებდით მაღალი ინტენსივობის არომატის მქონე ღვინოს, ვინაიდან საკე არის ძალიან მდიდარი არომატის მქონე სასმელი. ამიტომ, ჩვენ წარმოგიდგინეთ შესაბამისი ქართული ღვინოები, რომლებიც ჰარმონიაში შედიან იაპონურ სასმელებთან. საკე, მისი შემადგენლობით, არის დაბალ ალკოჰოლიანი სასმელი და ძალიან სასიამოვნო დასალევია, მთელ მსოფლიოში მას იყენებენ აპერიტივად. ანუ ის საჭიროა ე.წ. „გარდამავალ პერიოდში“, სანამ გადავალთ მაღალ ალკოჰოლურ პროდუქციაზე, როგორიცაა ქართული ჭაჭა ან ბრენდი”, – განაცხადა ზაზა გრიგალაშვილმა.

 

მსგავსი თემები