“საქართველოს მოქალაქის ბიომეტრული პასპორტის დაკარგვის ან მოპარვის შემთხვევაში, მხოლოდ იუსტიციის სახლში განცხადება საკმარისი აღარ იქნება”, – ამის შესახებ საქართველოს იუსტიციის მინისტრმა, თეა წულუკიანმა მთავრობის სხდომის დასრულების შემდეგ განაცხადა.
როგორც თეა წულუკიანმა აღნიშნა, ბიომეტრული პასპორტის ჩანაცვლებამდე აუცილებელი იქნება, მოქალაქემ წარადგინოს დასტური, რომ ამის შესახებ პოლიციაში განაცხადა.
„2019 წლის პირველი ნოემბრიდან ახალი წესი შევა ძალაში. როდესაც დავკარგავთ ან მოგვპარავენ საქართველოს მოქალაქის ბიომეტრულ პასპორტს, საკმარისი არ იქნება ამის შესახებ იუსტიციის სახლში ან ჩვენ სხვა ტერიტორიულ სამსახურებში უბრალო გაცხადება იმის შესახებ, რომ პასპორტი დავკარგეთ ან მოგვპარეს. აუცილებელი იქნება ბიომეტრული პასპორტის ჩანაცვლებამდე მოქალაქემ მოიტანოს დასტური, რომ ამის შესახებ განაცხადა პოლიციაში. ეს შეეხება არა მხოლოდ საქართველოს ტერიტორიაზე მყოფ ჩვენ მოქალქეებს, არამედ ყველა ჩვენს მოქალაქეს, ვინც უცხოეთში იმყოფება. უცხოეთში მყოფი მოქალაქეები იმ ქვეყნის დადგენილი წესით, რომელ ქვეყანაშიც იმყოფებიან, ჯერ უნდა მივიდნენ შესაბამის ორგანოში, ეს იქნება პოლიცია თუ სხვა, განაცხადონ, რომ საქართველოს მოქალაქის პასპორტი დაკარგეს ან მოპარეს და იქიდან წამოღებული ცნობით მივიდნენ საკონსულოში. მხოლოდ ამ ცნობით შეიძლება დაკარგული ან მოპარული პასპორტის ჩანაცვლება“, – განაცხადა თეა წულუკიანმა.
მისივე თქმით, ცვლილების მიზანია ვიზალიბერალიზაციის შენარჩუნება.
„ევროპულ ქვეყანებში, ხშირად საქართველოს მოქალაქეების ნაწილი, აცხადებს, რომ დაკარგა ან მოპარეს პასპორტი. სინამდვილეში ეს ასე არაა. რეალურად მოქალაქე ინარჩუნებს ორ სამგზავრო დოკუმენტს, რაც მოცემული ევროპული ქვეყნებისთვის და მათი სამართალდამცველი ორგანოებისთვის არის უდიდესი პრობლემა“, – განაცხადა თეა წულუკიანმა.
