15 ხმით, 4-ის წიანაღმდეგ, საპარლამენტო უმრავლესობის გადაწყვეტილებით, გაერთიანებული კომიტეტების სხდომაზე ნიკა მელიასთვის იმუნიტეტის მოხსნას მხარი დაუჭირეს.
გადაწყვეტილებას, რომლის მიხედვითაც მელიას შესაძლოა, პატიმრობა შეეფარდოს, კენჭი რამდენიმე წუთის წინ საპროცედურო და იურიდიულ საკითხთა კომიტეტის სხდომაზე უყარეს.
აღნიშნულ საკითზე მომხსენებლები იყვნენ გენერალური პროკურატურის საგამოძიებო ნაწილის უფროსის მოადგილე რევაზ ბაღაშვილი და გენერალური პროკურატურის საგამოძიებო ნაწილის საპროკურორო ზედამხედველობის სამმართველოს უფროსი ამირან გულუაშვილი.
საპროცედურო და იურიდიულმა კომიტეტებმა საკითხს ცალ-ცალკე უყარეს კენჭი. უფრო ზუსტად, საპროცედურო საკითხთა და წესების კომიტეტის 6-მა წევრმა, პროკურატურისთვის მელიას დაპატიმრებაზე თანხმობის მიცემას მხარი დაუჭირა, 1 კი წინააღმდეგ წავიდა.
რაც შეეხება იურიდიულ კომიტეტს, მისმა 9 წევრმა ამ გადაწყვეტილებას მხარი დაუჭირა, 3 კი წინააღმდეგ წავიდა. კომიტეტების გაერთიანებულ სხდომაზე, აღნიშნულ საკითხზე, თითქმის 6 საათის განმავლობაში მსჯელობდნენ. საკითხი დღესვე პარლამენტის პლენარულ სხდომაზე გავა. პროკურატურა ნიკა მელიას ბრალს საზოგადოებრივი წესრიგისა და უშიშროების წინააღმდეგ მიმართული დანაშაულის ჩადენაში სდებს.
გენერალური პროკურორის პარლამენტისადმი გაგზავნილ მიმართვაში ნათქვამია, რომ მან შეძლო დაეყოლიებინა მშვიდობიანი მომიტინგეები სამართლადამცავებზე ძალადობრივ თავდასხმაში.
გენერალური პროკურორის შეფასებით, მოცემულ შემთხვევაში სახეზეა აღკვეთის ღონისძიების გამოყენების როგორც ფაქტობრივი, ასევე ფორმალური საფუძველი. შეგახსენებთ, რომ დეპუტატის დაკავებაზე ან დაპატიმრებაზე პარლამენტის მიერ თანხმობის მიცემის შემთხვევაში, პარლამენტის წევრს უფლებამოსილება დაკავების ან დაპატიმრების პერიოდით შეუჩერდება. პარლამენტის წევრის დაკავება ან დაპატიმრება, ასევე მისი საცხოვრებელი ან სამუშაო ადგილის, მანქანის ან პირადი გაჩხრეკა მხოლოდ პარლამენტის წინასწარი თანხმობით შეიძლება. გამონაკლისია დანაშაულზე წასწრების შემთხვევა, რაც პარლამენტს დაუყოვნებლივ უნდა ეცნობოს.
შეგახსენებთ, რომ ნიკა მელიასთვის იმუნიტეტის მოხსნის მოთხოვნით, პარლამენტს პროკურატურამ მიმართა. სხდომა პარლამენტში დილის 09:00 საათზე დაიწყო.
