ნატო-ს ყოფილი გენერალური მდივანი ანდერს ფოგ რასმუსენი გვირჩევს, ნატოში ოკუპირებული ტერიტორიების გარეშე შევიდეთ
„2008 წლის ბუქარესტის სამიტზე მივიღეთ გადაწყვეტილება, რომ საქართველო და უკრაინა გახდებიან ნატოს წევრები. საქართველო ყველა კრიტერიუმს აკმაყოფილებს, რომ გახდეს ნატოს წევრი, მაგრამ რჩება ერთი მთავარი პრობლემა, ეს არის აფხაზეთისა და სამხრეთ ოსეთის საკითხი. ჩვენ ამ საკითხზე გამოსავალი უნდა ვიპოვოთ. ჩემი შემოთავაზებაა, რომ ნატოს მმართველობა გავრცელდეს საქართველოს ხელისუფლების მიერ კონტროლირებად ტერიტორიებზე. ეს გამორიცხავს აფხაზეთისა და სამხრეთ ოსეთის ტერიტორიებს“ – ეს განცხადება ნატო-ს ყოფილმა გენერალურმა მდივანმა, ანდერს ფოგ რასმუსენმა თბილისში, საერთაშორისო კონფერენციაზე გააკეთა.
მისივე განცხადებით, თუ ქართველები გადავწყვეტთ რომ ოკუპირებული ტერიტორიებს გარეშე შევიდეთ ნატოში, პროცესები დაიწყება.
„იმ წევრებისთვის, რომლებიც თავს იკავებენ, ადვილია თქმა, რომ საქართველოს აქვს გადაუწყვეტელი სასაზღვრო საკითხები რუსეთთან. ჩვენ არ შეგვიძლია საქართველოსთვის უსაფრთხოების გარანტიების მიცემა და მეხუთე მუხლის მთელ საქართველოზე გავრცელება. მე ვფიქრობ, პირველი ნაბიჯი ამ საკითხზე მსჯელობისთვის საქართველოში უნდა გადაიდგას და შემდეგ უნდა წავიდეს ნატო-ში. თუ თქვენ კითხულობთ ყოველწლიურ პროგრამებს, საქართველო თითქმის ყველა პირობას ასრულებს, მაგრამ ჯერ კიდევ გაქვთ პრობლემები საზღვრებთან დაკავშირებით. მაგრამ ამავე დროს, ჩვენ ვერ მივცემთ პუტინს ვეტოს უფლებას, ეს მან არ უნდა გადაწყვიტოს, შეუერთდება თუ არა საქართველო ნატო-ს. ეს საქართველოს მთავრობის და ნატო-ს საბჭოზეა დამოკიდებული.
ჩვენ პროცესი უნდა დავიწყოთ და თუ ქართველები გადაწყვეტენ, რომ მეხუთე მუხლი ოკუპირებულ ტერიტორიებზე არ გავრცელდეს, ჩვენ შეგვიძლია ამის მიღება, რომ აღნიშნული მუხლი, მხოლოდ საქართველოს მთავრობის კონტროლირებულ ტერიტორიაზე გავრცელდეს. ამის შემდეგ ჩვენ შეგვიძლია პროცესის დაწყება. ამით ჩვენ შევძლებთ კრემლისთვის ცხადი სიგნალის გაგზავნას, არ გააგრძელოს ეს გზა, რადგან პოზიტიური განვითარება არ ექნება მისთვის” – აღნიშნა რასმუსენმა კონფერენციაზე .
