“რეგულარულად გვიწევს ძალიან მძიმე მემკვიდრეობასთან გამკლავება, რომელიც 2008 წლის აგვისტოს ომის შემდეგ მივიღეთ და დღემდე გრძელდება”, – ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრის მოვალეობის შემსრულებელმა, ქეთევან ციხელაშვილმა პარლამენტში სიტყვით გამოსვლისას განაცხადა.
მისი თქმით, 11 წელია, რაც ქვეყანა ღია რუსული ოკუპაციის პირობებში ცხოვრობს და მოსახლეობას, ყოველდღიურად, არაერთ სირთულესთან უწევს შეჭიდება.
„ის უკანასკნელი ეპიზოდები, როგორიც იყო უკანონო ბარიკადების მშენებლობა სოფელ გუგუტიანთკარში, ჩვენი თანამოქალაქეების დაკავება ეკლესიაში, სოფელ აძვისთავში, ან გადაადგილების დამატებით შეზღუდვა, როგორც თუნდაც დღეს არის, ამჯერად ორი დღით ახალგორის მიმართულებით, არის იმ ინსტრუმენტების ერთობლიობა, რომლითაც ეს რეჟიმი 11 წლის განმავლობაში მოქმედებს. რა თქმა უნდა, ყველაზე მძიმეა, როცა ეს ყველაფერი ადამიანის სიცოცხლეს ეხება. ჩვენი ოთხი ახალგაზრდის – ბაშარულის, ოთხოზორიას, ტატუნაშვილისა და კვარაცხელიას უმძიმესი შემთხვევები არის ტრაგედია არა მხოლოდ მათი ოჯახებისთვის, არამედ მთელი საზოგადოებისათვის”, – განაცხადა ციხელაშვილმა.
ციხელაშვილის განმარტებით, საქმე გვაქვს ძალიან ცოცხალ საფრთხესთან, რომელიც ყოველდღიური გამოწვევაა ქვეყნისა და ათიათასობით ჩვენი თანამოქალაქისთვის.
“ეს ყველაფერი გვაჩვენებს და შეგვახსენებს იმას, რომ ჩვენ საქმე ძალიან ცოცხალ პროცესთან, ცოცხალ საფრთხესთან გვაქვს, რომელიც ყოველდღიური გამოწვევაა ჩვენი ქვეყნისთვის და ათიათასობით ჩვენი თანამოქალაქისთვის. ეს გვავალდებულებს, რომ ამ საკითხების დაძლევისას ძალიან გონიერები და პრინციპულები ვიყოთ. ამ საფრთხეს პირდაპირი გაგებით უმკლავდება 50 ათასამდე ჩვენი მოქალაქე 100-ზე მეტ სოფელში, რომლებიც საოკუპაციო ხაზის გასწვრივ მდებარეობს; 300 ათასამდე დევნილი, რომელსაც დღემდე არ ეძლევა საკუთარ სახლში დაბრუნების საშუალება; 200 ათასამდე ადამიანი, რომელიც დღეს ოკუპირებული აფხაზეთსა და ცხინვალის რეგიონში ცხოვრობს. ეს რეგიონები, თავის მხრივ, 70%-ით არის დაცლილი მზარდი მილიტარიზაციისა და იზოლაციის პირობებში“, – განაცხადა ქეთევან ციხელაშვილმა.
ციხელაშვილმა ასევე ყურადღება გაამახვილა გალისა და ახალგორის ქართველ მოსახლეობაზე.
„ყველამ ვიცით, რომ ყველაზე მოწყვლადი გალისა და ახალგორის ქართველი მოსახლეობაა, სადაც მათი ეთნიკური კუთვნილება, საუბედუროდ, დისკრიმინაციის საფუძველია. სწორედ ამიტომ, ეს მოსახლეობა, მათი უფლებების დაცვა, მათი მდგომარეობის გაუმჯობესება იყო და მომავალში კიდევ უფრო მეტად იქნება ჩვენი პოლიტიკის პრიორიტეტი. ასევე არ გვავიწყდება კოდორის მოსახლეობა, რომელიც კიდევ უფრო შეზღუდულია თუნდაც გადაადგილების შესაძლებლობით“, – განაცხადა ქეთევან ციხელაშვილმა.
