მსოფლიოს ჩემპიონატიდან დაბრუნებული ქალთა ნაკრების წევრებისთვის საზეიმო ცერემონია გაიმართა

ნონა გაფრინდაშვილის სახელობის ჭადრაკის სასახლეში მსოფლიოს გუნდური ჩემპიონატიდან დაბრუნებული ქალთა ნაკრებისადმი მიძღვნილი საზეიმო ცერემონია გაიმართა. ჩემპიონატის ბრინჯაოს პრიზიორებს ასტანაში წარმატებული გამოსვლა პირადად მიულოცეს განათლების, მეცნიერების, კულტურისა და სპორტის მინისტრის პირველმა მოადგილე მიხეილ გიორგაძემ და მოადგილე შალვა გოგოლაძემ. მიღებას ესწრებოდნენ სამინისტროს სპორტის დეპარტამენტის უფროსი ირაკლი დოლაბერიძე, ჭადრაკის ფედერაციის პრეზიდენტი გიორგი გიორგაძე, ვეტერანი მოჭადრაკეები და მოწვეული სტუმრები.​

ქალ მოჭადრაკეთა ნაკრებმა ყაზახეთში გამართულ მსოფლიოს გუნდურ ჩემპიონატზე მესამე ადგილი დაიკავა. ელიზბარ უბილავას გაწვრთნილმა გუნდმა მსოფლიოს გუნდური ჩემპიონატის დასკვნით ტურში დაძაბულ ბრძოლაში ფრედ დაამთავრა შეხვედრა რუსეთის უძლიერეს ნაკრებთან, რომელმაც მეორე ადგილი დაიკავა. ჩემპიონის ტიტულს ჩინეთი დაეუფლა. 12-12 ქულით III-IV ადგილები საქართველომ და უკრაინამ გაინაწილეს. თუმცა საერთო ჯამური ქულებით ბრინჯაოს მედალი საქართველოს ნაკრებმა დაისაკუთრა.

ქართველმა ქალებმა ბრწყინვალედ იასპარეზეს ინდივიდუალურ დაფებზეც. სათადარიგო დაფაზე ოქროს მედალი დაისაკუთრა სალომე მელიამ, მეორე და მესამე დაფაზე ვერცხლის მედლებს მერი არაბიძე და ლელა ჯავახიშვილი დაეუფლნენ. პირველ დაფაზე ბრინჯაოს მედალი მოიპოვა გუნდის ლიდერმა ბელა ხოტენაშვილმა. მეოთხე დაფაზე მეოთხეზე გავიდა ნინო ბაციაშვილი, რომელმაც ყველა პარტია შავებით ითამაშა.

საზეიმო ცერემონიის შემდეგ, ოფიციალურად გაიხსნა საქართველოს ქალთა 76-ე ჩემპიონატი. პირველობა, რომელშიც ქვეყნის წამყვანი მოჭადრაკეები მიიღებენ მონაწილეობას, 30 მარტს დასრულდება.

მსგავსი თემები