28 თებერვალს, თბილისის ერთ-ერთი საჯარო სკოლის მოსწავლეებმა, მანდატურს შეატყობინეს მათი თანაკლასელი გოგონას მხრიდან შესაძლო სუიციდის მცდელობის თაობაზე. შემთხვევა დღეს დილით, სასწავლო პროცესის დაწყების შემდეგ მოხდა, – აღნიშნულის შესახებ განცხადებას მანდატურის სამსახური ავრცელებს და მოუწოდებს მედიასაშუალებებს, საქმის სენსიტიურობიდან გამომდინარე, არასწორი ინფორმაციის გავრცელებისგან თავი შეიკავონ.
“28 თებერვალს თბილისის ერთ-ერთი საჯარო სკოლის მოსწავლეებმა მანდატურს შეატყობინეს მათი თანაკლასელი გოგონას მხრიდან შესაძლო სუიციდის მცდელობის შესახებ. კერძოდ, გოგონამ სატელეფონო შეტყობინებით თანაკლასელს აცნობა, რომ სკოლაში მისვლამდე, სუიციდის მიზნით, მედიკამენტები მიიღო და სკოლის მიმდებარე ტერიტორიაზე იმყოფებოდა.
შემთხვევა დღეს დილით, სასწავლო პროცესის დაწყების შემდეგ მოხდა. აღნიშნულ ფაქტთან დაკავშირებით, მანდატურმა დაუყოვნებლივ მოახდინა რეაგირება, უმოკლეს დროში მოძებნა გოგონა, გამოიძახა სასწრაფო სამედიცინო დახმარების ბრიგადა და ფაქტის შესახებ შინაგან საქმეთა სამინისტროს შეატყობინა.
ამჟამად, მოზარდის ჯანმრთელობას საფრთხე არ ემუქრება. საქმეში ასევე ჩაერთო მანდატურის სამსახურის ფსიქოლოგიური მომსახურების ცენტრი. მოზარდთან მაღალკვალიფიციური ფსიქოლოგები იმუშავებენ. აღნიშნულ ფაქტთან დაკავშირებით მიმდინარეობს გამოძიება.
ვთხოვთ ყველა საინფორმაციო საშუალებას, საკითხის სენსიტიურობიდან გამომდინარე, გამოძიების დასრულებამდე, თავი შეიკავონ აღნიშნული ფაქტის ინტერპრეტირებისა და დაუზუსტებელი ინფორმაციის გავრცელებისაგან”, – აღნიშნულია მანდატურის სამსახურის მიერ გავრცელებულ განცხადებაში.
