“ისიც კი მოახერხეს, რომ მაისურსა და პლაკატზე დაწერეს – “არა ოკუპაციას!”, როდესაც თავად არიან ოკუპაციის მთავარი შემოქმედები” – გია ვოლსკი

„ისიც კი მოახერხეს ზოგიერთებმა, რომ მაისურსა და პლაკატზე დაწერეს – არა ოკუპაციას! როდესაც თავად არიან ოკუპაციის მთავარი შემოქმედები“, – ასე გამოეხმაურა საპარლამენტო უმრავლესობის ლიდერი, გია ვოლსკი პარლამენტის პლენარულ სხდომაზე პარტია „ევროპული საქართველოს“ წევრების მისვლას მაისურზე წარწერით – „სირცხვილია!“.

ვოლსკის განცხადებით, ის, რომ დღეს საერთაშორისო რეიტინგში საქართველო მოწინავე პოზიციებს იკავებს, მმართველი გუნდის დამსახურებაა. მისი თქმით, ამაში თავისი წვლილი ყოფილმა პრემიერ-მინისტრმა, მამუკა ბახტაძემაც შეიტანა.

„არ არსებობს ქვეყანა, განვითარებული დემოკრატია მაქვს მხედველობაში, სადაც დაშვებულია პლურალიზმი, სიტყვის თავისუფლება და სადაც ამდენი სიცრუე ბატონობს საინფორმაციო ველზე. ისიც კი მოახერხეს ზოგიერთებმა,  რომ დაიწერეს ზოგმა მაისურზე, ზოგმა პლაკატზე – არა ოკუპაციას! როდესაც თავად არიან ოკუპაციის მთავარი შემოქმედები. არ არსებობს არცერთი საერთაშორისო რეიტინგი, სადაც საქართველო არ დგას მოწინავე პოზიციებზე. რასაკვირველია, ეს არ ნიშნავს იმას, რომ მძიმე პრობლემა როგორიც არის უმუშევრობა, როგორიც არის სიღატაკე, დაძლეულია. თუმცა ტენდენციები მნიშვნელოვანად გაუმჯობესებულია და ამაში თავისი წვლილი შეიტანა ყოფილმა პრემიერ-მინისტრმა მამუკა ბახტაძემ.

ძალიან ბევრი ჩემი კოლეგა გასული იყო სოფლებში. ხვდებოდა ხალხს. ეს გაგრძელდება და უნდა ითქვას, თითოეული საჯარო მოხელის პასუხისმგებლობა, დაწყებული დაბალი რგოლიდან დამთავრებული უმაღლეს რგოლზე, არის საგანგებო მნიშვნელობის. ეს პასუხისმგებლობა უნდა გაიზარდოს და პროფესიონალიზმთან ერთად უნდა იყოს ყოველდღიური ზრუნვის საგანი თითოეული ადამიანის ყოფა-ცხოვრება ჩვენ ქვეყანაში. ამასთან დაკავშირებით ვფიქრობ, სწორი გადაწყვეტილებაა უმრავლესობამ წარადგინოს პრემიერ-მინისტრობის კანდიდატად ბატონი გიორგი გახარია.

ძალიან მძიმე რეალობაა ის, რომ ჩვენი პოლიტიკური ოპონენტები არ იბრძვიან იმისათვის, რათა სიმართლე და ჭეშმარიტება დადგინდეს. ერთადერთი მიზანი ამ სტრატეგიისა არის ის, რომ ტოლობის ნიშანი დასვან იმ ბოროტებას შორის, რაც ჩაიდინეს, თარიღებს აღარ ჩამოვთვლი, მხოლოდ 2011 წლის 26 მაისი ეყოფათ და იმ მოვლენებს შორის, რომელსაც სამწუხაროდ, ადგილი ჰქონდა სულ ახლახან 20-21 ივნისს. საზოგადოებას კარგად ესმის, რომ მკვლელობა, წამება და შეურაცხყოფა იყო სახელმწიფოს სტრატეგია, რომელიც დღეს არ გააჩნია“, – განაცხადა გია ვოლსკიმ.

მსგავსი თემები