დღეს მილიონობით ადამიანი უარს აცხადებს ერთი საათით ელექტროენერგიის გამოყენებაზე – თბილისში “დედამიწის საათი” აღინიშნა

მიმდინარე წელს მსოფლიო “დედამიწის საათს” დღეს, 30 მარტს აღნიშნავს. “დედამიწის საათი” პლანეტის დასაცავი ყოველწლიური ღონისძიებაა, რომელიც ყოველი მარტის თვის ბოლო შაბათს ტარდება.

ამ დღეს მილიონობით ადამიანი უარს აცხადებს ერთი საათით ელექტროენერგიის გამოყენებაზე. ღონისძიების მთავარი მიზანია კლიმატის ცვლილების შესახებ ინფორმაციის მიწოდება, საზოგადოების გარემოსდაცვითი ცნობიერების ამაღლება, პასუხისმგებლობის გაზრდა, საკუთარი ქცევის შეფასება და გარემოს სასარგებლოდ შეცვლა.

ყველაზე მასშტაბურ გარემოსდაცვით აქციას საქართველოს დედაქალაქი ტრადიციულად შეუერთდა და “დედამიწის საათი 2019-ის” აღსანიშნავად, ლისის ტბის მიმდებარე ტერიტორიაზე, სპორტული ღონისძიებები ჩატარდა.

აქტივობების ფარგლებში გაიმართა ველომსვლელობა და გარბენი 6 კმ-ის დისტანციაზე, რომელშიც მოხალისეებთან ერთად მონაწილეობა მიიღო გარემოს დაცვის და სოფლის მეურნეობის მინისტრმა ლევან დავითაშვილმა და არასამთავრობო, კერძო სექტორის წარმომადგენლებმა.

მინისტრმა ღონისძიების მონაწილეებს სიტყვით მიმართა და გარემოსთვის ეკოლოგიურად სუფთა ტრანსპორტისა და საზოგადოების გარემოსდაცვითი ცნობიერების ამაღლების მნიშვნელობაზე ისაუბრა.

სპორტული ღონისძიების მონაწილეებს დაურიგდათ სამახსოვრო მაისურები და სერტიფიკატები, ხოლო გამარჯვებულები დაჯილდოვდნენ პარტნიორი ორგანიზაციების: კარფურის, სანტეს, ქართულ უნიკალურ ღვინოს, დიდგორის მიერ დაწესებული საჩუქრებითა და ვაუჩერებით.

დედამიწის საათისადმი მიღვნილი სპორტული ღონისძიება საქართველოს გარემოს დაცვისა და სოფლის მეურნეობის  სამინისტროს, გარემოსდაცვითი ინფორმაციისა და განათლების ცენტრის და საქართველოს კორპორატიული სპორტის ფედერაციის ორგანიზებით, ასევე ბუნების დაცვის მსოფლიო ფონდის (WWF), CENN-ისა და ავსტრიის თანამშრომლობა განვითარებისათვის/ Austrian Development Cooperation მხარდაჭერით გაიმართა.

მსგავსი თემები