ვირტუალური გაკვეთილების მიუხედავად, კერძო სკოლები სწავლის საფასურს სრულად ითხოვენ – მშობლები საჯარო სკოლაში გადასვლაზე ფიქრობენ

„არც ვდაობთ, რომ კერძო სკოლებმა გარკვეული შეღავათი უნდა გაწიონ იმ სერვისების ხარჯზე, რასაც მოსწავლეები ვერ იღებენ“ – აცხადებს სკოლის ადმინისტრატორთა ასოციაციის თანადამფუძნებელი არჩილ სუმბაძე „მედიაცენტრ მთავართან“ ინტერვიუში და იმ პრობლემებზე  საუბრობს, რასაც მოსწავლეები, მშობლები და სკოლები ინტერნეტ გაკვეთილებზე გადასვლისა და გაუმართავი ადმინისტრირების გამო აწყდებიან.

რა პრობლემები შეუქმნა „ონლაინგაკვეთლებმა“ მშობლებსა და მოსწავლეებს; რატომ ახდევინებენ  კერძო სკოლები მშობლებს სწავლების სრულ საფასურს; იჩენენ თუ არა სკოლები სამოქალაქო პასუხისმგებლობას და ფიქრობენ თუ არა გარკვეულ შეღავათებზე; მოუწევთ თუ არა მშრობლებს კერძო სკოლებიდან საჯარო სკოლებში გადანაწილება – ამ და სხვა საინტერესო საკითხებზე „მედიაცენტრ მთავარს“  სკოლის ადმინისტრატორთა ასოციაციის თანადამფუძნებელი არჩილ სუმბაძე ესაუბრა.       

მედიაცენტრი მთავარი“: ბევრი შეტყობინება შემოგვდის კერძო სკოლების მშობლებისგან. ძალიან ბევრმა დაკარგა სამსახური, ნაწილს კი ხელფასი გაუნახევრეს ან უხელფასო შვებულებაში გაუშვეს. მთავარი, რა პრობლემასაც მშობლები აყენებენ, შემდეგია –  კერძო სკოლებმა, ამ კრიზისულ პერიოდში გაანახევრონ გადასახადი. ისინი ისედაც ზოგავენ ინფრასტრუქტურულ ხარჯებს, კომუნალურ გადასახადებს, კვების თანხებს, მოსწავლეები საღამომდე სკოლაში არ რჩებიან და პირიქით, მშობლებს მოემატათ დატვირთვაც და ხარჯიც. რამდენად არის მზაობა, რომ კერძო სკოლებმა გაანახევრონ გადასახადი?

არჩილ სუმბაძე:  ბუნებრივია, ამა თუ იმ ორგანიზაციის, კომპანიისა, თუ დირექტორის, დამფუძნებლის სოციალურ პასუხისმგებლობაზე ვერ ვისაუბრებ, ინდივიდუალური საკითხია. რაც შეეხება განახევრებას, თუ გამესამედებას, ეს ინდივიდუალურ შემთხვევებზეა დამოკიდებული. ამ დისტანციურ მოდელზე გადასვლასთან ერთად, ყველა სკოლას აქვს სხვადასხვა ტიპის მოცემულობა. არის სკოლები, რომლის გადასახადშიც შედის ძალიან ბევრი დამატებითი სერვისი და ბუნებრივია, იმის მოლოდინი, რომ შეღავათები მიებმება ამ სერვისების მოცულობას, არის ლოგიკური. არის სკოლები, რომლის შემთხვევაშიც, გადასახადის უდიდეს წილს  მხოლოდ და მხოლოდ პერსონალის ანაზღაურება შეადგენს. ასე რომ, ამ ყველაფერს ინდივიდუალურად უნდა შევხედოთ.

შეიძლება, არსებობდეს სკოლები, რომლებისგანაც შესაძლებელია არსებობდეს მოლოდინი, რომ სწავლის საფასური განახევრდება, მაგრამ არსებობს განსხვავებული ვერსიებიც. ზოგიერთის შემთხვევაში, შესაძლებელია, უფრო დაბალ პროცენტის მოლოდი გვქონდეს,  სხვა შემთხვევაში კი შედარებით მაღალი. ის დამატებითი სერვისები, რომლითაც ბავშვები ვერ სარგებლობენ, ბუნებრივია, ანგარიშგებაში უნდა აისახოს.

ყველა ის კერძო სკოლა, რომელთანაც მე მქონია კონტაქტი, გარკვეული ფორმებით აპირებს ის სერვისები, რომლებსაც ბავშვები ვერ იღებენ, ასახონ მშობლების სასარგებლოდ.  ეს შეეხება იგივე კვების საკითხს, ტრანსპორტირებას, კომუნალურებს, რასაც არ იყენებენ ბავშვები და ეს ყველაფერი აისახება მშობლების სასარგებლოდ.

მედიაცენტრი მთავარი“:  სკოლების  დირექტორები  პასუხისმგებლობით ეკიდებიან აღნიშნულ საკითხს?

არჩილ სუმბაძე:  სხვის პასუხისმგებლობაზე მე ვერ ვისაუბრებ.  შემიძლია გითხრათ ჩემი  სკოლის დამოკიდებულებით და ასევე, იმ შთაბეჭდილებით, რაც მე შემექმნა ამ ჩვენი ასოციაციის კერძო სკოლებისგან. ყველა კერძო სკოლა, რომელთანაც მე მქონია კონტაქტი, ამა თუ იმ ფორმით აპირებს, რომ მსგავსი დანაზოგი, ის სერვისები, რომლებსაც ბავშვები ვერ იღებენ, ასახოს მშობლის სასარგებლოდ. ძალიან ნათელია, რომ მოსწავლეები ვერ იღებენ იმ სერვისებს, რომელიც სწავლის საფასურში შედიოდა და რა თქმა უნდა, ძალიან ნათელია ყველაფერი. ლოგიკურია, რომ ეს ყველაფერი ამა თუ იმ ფორმით აისახება მშობლების სასარგებლოდ.

მედიაცენტრი მთავარი“:  ფინანსური ნაწილი გასაგებია, გადავიდეთ ინტერნეტ სწავლების ხარისხობრივ ნაწილზე. როგორ ფიქრობთ, რამდენად ადეკვატური და ხარისხიანია ის სასწავლო პროცესი, რომელიცსკაიპითმიმდინარეობს და ბავშვები, განსაკუთრებით მცირეწლოვნები მობილურებსა და კომპიუტერებს მიეჯაჭვნენ?

არჩილ სუმბაძე: ცალსახა პასუხს ვერ გაგცემთ.  ეს არის სკოლის და მშობლების სწორი მენეჯმენტისა საკითხი. სკოლების ორი კატეგორია გამოიკვეთა – ერთი კატეგორია, რომელიც ცდილობს, სასწავლო პროცესი იმ მოცემულობით გააგრძელოს, როგორც იყო ტრადიციულ სასწავლო გარემოში. პირობითად, 7 გაკვეთილი გადაიტანოს ვირტუალურ სივრცეში. პირადად ჩემი შეხედულებით, ეს არ არის ეფექტური. როგორც ეკრანთან ურთიერთობის ნაწილში, ასევე ხარისხობრივ ნაწილში. დისტანციური სწავლების დიდი გამოცდილება სჭირდება. სჭიროა  მშობელთან ხარისხიანი და სწორი კომუნიკაცია, სწორი ინსტრუქცია და   რესურსების მრავალფეროვნება.

თუ გვაქვს მოლოდინი იმისა, რომ 7 გაკვეთილს, რომელსაც  საკლასო ოთახში ვატარებ, ახლა ჩავატაროთ ვირტუალურ სივრცეში, სრული ილუზიაა. ეს არ იმუშავებს, გამორიცხულია. თუ კი ჩვენ, ერთი მხრივ მასწავლებელმა, სკოლის ადმინისტრაციამ, პერსონალმა გადააწყო სასწავლო გეგმა, მეთოდოლოგია და რესურსები, ამ შემთხვევაში,  სკოლის შიგნით დაფარვა არის 100%-იანი, ვგულისხმობ იმას, რომ მას არ ჰყავს მოსწავლე, რომელიც ამ პროცესს გარეთ რჩება.

მედიაცენტრი მთავარი:“ რას ვეუბნებით  იმ ბავშვებს, რომლებიც სხვადასხვა მიზეზებით  პროცესს გარეთ რჩებიან. თუნდაც ინტერნეტთან ნაკლები ხელმისაწვდომობის  გამო, კომპიუტერის არქონის გამო, კომპიუტერთან მუშაობის უნარჩვევების არქონის გამო, ეს მოსწავლეების არათანაბარ პირობებში ჩაყენებას არ ნიშნავს?

არჩილ სუმბაძე: გეთანხმებით,  ვინც ამ პროცესების  მიღმა რჩება, სკოლამ მათზე  შესაბამისად უნდა იზრუნოს. ძალიან კარგია, „ტელესკოლის“ სახით დამატებითი რესურსი ჩნდება.  ამას როგორ გამოიყენებს ესა თუ ის კერძო სკოლა, ეს მათზეა დამოკიდებული. ჩვენს შემთხვევას და პრაქტიკაში გამოჩნდა, რომ სკოლების ერთი კატეგორიაა ცდილობს სასწავლო პროცესი გადაიტანოს პირდაპირ ვირტუალურ სივრცეში, რაც ჩემი შეხედულებით არ არის ეფექტური, როგორც ეკრანთან ურთიერთობის თვალსაზრისით, ასევე სწავლის ხარისხით.

მედიაცენტრი მთავარი:“ თქვენტელესკოლაახსენეთ, რომელიც საზოგადოებრივი მაუწყებლის პროექტია და ყველა გაკვეთილი გადაიცემა. ამ შემთხვევაში, როცა ტელევიზიით ყველა გაკვეთილის მოსმენა შემიძლია, სკოლაში არ დავდივარ, სახლში ხარჯი მეტი მაქვს, ბავშვს მარტო ვერ ვტოვებ, უნდა დავუჯდე და მივეხმარო ინტერნეტ საგაკვეთილო პროცესში და სწავლის სრული საფასურიც უნდა გადავიხადო.  რისთვის უნდა გადავუხადო კერძო სკოლას სწავლის საფასური, როცა ისედაც სახლში ვარ და გაკვეთილების მოსმენატელესკოლითაცშემიძლია?     

არჩილ სუმბაძე: ჩვენს შემთხვევაში, ერთია, რომ არს კონკრეტული გაკვეთილები, რომელიც არის უკუკავშირზე დამყარებული. ამას გარდა, ასევე არის დამატებითი გაკვეთილები მცირე ჯგუფებთან. სკოლის ფუნქცია ის არის, რომ ბავშვის აკადემიური მოსწრება ამ პერიოდში ისევე აკონტროლოს, როგორც მანამდე. ეს არ არის შეუძლებელი, თუ სწორადაა აწყობილი კომუნიკაცია მშობელსა და სკოლას შორის და გამართულია საკომუნიკაციო სისტემა. ბუნებრივია, გეთანხმებით, რომ მშობლის ჩართულობისა და დახმარების გარეშე ეს არ გამოვა. მით უმეტეს, როცა დაწყებითი კლასის მოსწავლეებზე ვსაუბრობთ.

მედიაცენტრი მთავარი:“ სკაიპით ჩატარებულ გაკვეთილებზე გკითხავთ, სადაც სერიოზული ხარვეზებია. თუნდაც ინტერნეტკავშირის გამო, თუნდაც იმის გამო, რომ ბავშვები საგაკვეთილო პროცესიდან ერთმანეთს აგდებენ

არჩილ სუმბაძე:  კერძო სკოლამ  ტექნიკური ადმინისტრირება ისე უნდა მოაგვაროს, რომ მსგავსი პრობლემები არ ჰქონდეთ მოსწავლეებს.  შეიძლება მიამიტურად ჟღერდეს რასაც ვამბობ, რომ შესაძლებელია ელექტრონულად მართო ეს პროცესები. როდესაც დისტანციურ მოდელზე გადასვლაზე დაიწყო საუბარი, 4-5 პლატფორმა დაიტესტა, მათ შორის „მაიკროსოფტის“ ჩათვლით, რომელსაც საჯაროები იყენებენ. 4-5 მოდელს ერთბაშად ვამუშავებდით, რომელი მოდელი იქნებოდა ყველაზე ადეკვატური. „გუგლის“ ყველაზე მდგრად სერვისებზე ვთქვით უარი, რადგან ბავშვებს ამ პლატფორმაზე ექნებოდათ საშუალება, ერთმანეთი გაეჩუმებინათ. ეს კი არასერიოზულ მიდგომას გამოიწვევდა. ამიტომ, ყველა სკოლამ სწავლების ის პლატფორმა უნდა შეარჩიოს რაც მოსწავლეების ხარისხიან, ადეკვატურ და გამართულ სასწავლო პროცესს შექმნის.

გეთანხმებით აბსოლუტურად, სკოლამ ტექნიკური ადმინისტრირება ისე უნდა მოახერხოს, რომ ბავშვი სასწავლო პროცესში სრულად იყოს ჩართული.  

მედიაცენტრი მთავარი:“  თქვენ აღნიშნეთ, რომ ერთერთ პლატფორმაზე თქმით უარი, რატომ, უხარისხო და იაფიანი სერვისი ხომ არ იყო?

არჩილ სუმბაძე: ამაზე უარი ვთქვით ამ რისკების გამო, რაც თქვენ ჩამოთვალეთ „სკაიპთან“ დაკავშირებით. გარდა ამისა, „სკაიპში“ ბევრი ბავშვის ჩართვა არაა შესაძლებელი. მას თავისი ლიმიტი აქვს და ბუნებრივად იქმნება პრობლემები. ეს არის სუფთა ადმინისტირების საკითხი და ყველას ერთ თარგზე მოჭრა არის არასწორი.

ბუნებრივია და მესმის მშობლების მოლოდინი. გარკვეულ საკითხებს  ერთი სკოლა სხვანაირად “ამენეჯმენტებს” და მეორე სხვანაირად. არის სკოლები, რომლის ვიდეო გაკვეთილები არასერიოზულია, ასევე არის სკოლები, რომლებიც კარგად ახორციელებენ ამ პროცესს. აბსოლუტურად მესმის მშობლების მოლოდინი, რომელიც ამ პერიოდში არსებობს.

მედიაცენტრი მთავარი:“ იმ მთავარი პრობლემის გამო, რასაც კერძო სკოლებში სწავლის საფასურის სრულად გადახდა და ნულოვანი შეღავათი ჰქვია, ელოდებით, რომ მოსწავლეებს საჯარო სკოლებში გადასვლა მოუწევთ?

არჩილ სუმბაძე: სკოლებისა და მშობლების თანამშრომლობა სასიცოცხლოდ მნიშვნელოვანია. კრიზისულ სიტუაციაში ყველამ უნდა ისაუბროს გამოსავალზე. ორი აზრი არ არსებობს, ორივე მხარეს აკისრია თავისი ვალდებულება. ერთია რაც ახლა ხდება, მეორეა, რა იქნება, როცა  ეს კრიზის გადაივლის.  რაც შეეხება მობილობას, პროცესი  ჩვეულებრივ, ღიაა, ფიზიკურად ეს შესაძლებელია, მობილობა შეზღუდული არ არის. ზოგადად მსგავსი განწყობები არსებობს და რამდენიმე კერძო სკოლამ დაიჩივლა კიდეც აღნიშნულთან დაკავშირებით, რომ მოსწავლეები გადასვლაზე ფიქრობენ.  

„მედიაცენტრი მთავარის“ მასალის გამოყენების შემთხვევაში, აუცილებელია წყაროს და ლინკის მითითება

მსგავსი თემები