თბილისში, გუდიაშვილის მოედანზე მიმდინარე სარეაბილიტაციო სამუშაოების დროს, ბ. ახოსპირელის ქუჩის N4-ის სარდაფში განლაგებულ სხვადასხვა ზომის ქვევრში, კერამიკული ნაწარმი – დიდი, საშუალო და მცირე ზომის, მოჭიქული სამი დოქი და სხვადასხვა ზომის ჭინჭილა აღმოაჩინეს. ჭურჭელი ერთნაირად, მომწვანოდაა მოჭიქული. კერამიკული ნაწარმი, შესაძლოა, გვიანი შუა საუკუნით დათარიღდეს.
როგორც მედიაცენტრ “მთავარს” თბილისის განვითარების ფონდში განუცხადეს, აღმოჩენილი ჭურჭელი ძალიან ჰგავს იმავე ტერიტორიაზე, ახოსპირელის N7/2-ში მდებარე საცხოვრებელი სახლის სარდაფში აღმოჩენილ სხვა კერამიკულ ჭურჭელზე დატანილ დამღას, წვეროსანი მამაკაცის ანფასს, რომელსაც პირობითად „თბილისელი“ ეწოდა.
მათივე ინფორმაციით, ერთ-ერთ ქვევრში სპილენძის აზარფეშა – გრძელტარიანი, ფართოპირიანი დიდი კოვზისებური ღვინის სასმისი და სპილენძის თეფში აღმოჩნდა.
გუდიაშვილის მოედანზე სარეაბილიტაციო სამუშაოები დედაქალაქის მერიისა და თბილისის განვითარების ფონდის პროექტის “ახალი ტფილისი” ფარგლებში მიმდინარეობს. სამუშაოებს, საქართველოს კულტურული მემკვიდრეობის დაცვის ეროვნული სააგენტოს არქეოლოგების ზედამხედველობით, სამშენებლო კომპანიები – „ინსი“ და „ანაგი“ ახორციელებენ.