„გენეტიკური დიაგნოზის“ ბავშვები მედიკამენტების გარეშე დარჩნენ, “რა გვეშველება”? – მშობლების კითხვა

„კორონავირუსის პანდემიის“ გამო მთელ მსოფლიოსა და საქართველოში დაწესებული შეზღუდვები ყველას თანაბრად შეეხო, მათ შორის სპეციალური საჭიროების მქონე ბავშვებს. ერთ-ერთი ასეთი კატეგორია  „გენეტიკური დიაგნოზის“ ბავშვები არიან.

„მედიაცენტრ მთავარს“ არაერთი მშობელი დაუკავშირდა, რომლებმაც კონკრეტულ საკითხთან დაკავშირებით დახმარება გვთხოვეს.  შესაბამისად, საკითხის გასარკვევად  დავუკავშირდით ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს.

მშობლების კითხვა: ბავშვებს, რომლებსაც აქვთ გენეტიკური დიაგნოზი და არიან სპეციალურ კვებაზე, სახელმწიფოსგან იღებდნენ ამ სპეციალურ პრეპარატებს. ახლა კი ამ პრეპარატების მიღებაზე შეგვექმნა პრობლემა. კერძოდ, პროგრამით გათვალისწინებულ საკვებ დანამატებზე შეიქმნა დეფიციტი, რა ბედი ელის ამ ბავშვებს როდის მიიღებენ  ყველა ასაკის კატეგორიაზე მარაგს?

კითხვა მეორე: ჩემს შვილს გენეტიკური დიაგნოზი აქვს ფენილკეტონურია. სპეციალურ კვებაზეა. ანუ ცილოვან პროდუქტები არ უნდა მიიღოს და რასაც ვერ იღებს,  საკომპენსაციოდ, უნდა მიიღოს ვიტამინების ნაკრები – წამალი. სახელმწიფოსგან ვიღებთ ამ წამალს და ახლა რაღაც გარკვეული პრობლემა შეიქმნა. ექიმი არაფერს გვეუბნება და მოკლედ ვართ ასე ავ დღეში. არადა, ძალიან მნიშვნელოვანია ეს წამალი ყველასთვის. რა გვეშველება?

როგორც „მედიაცენტრ მთავარს“ სამინისტროში განუცხადეს, პროდუქცია გზაშია და მარაგი მალე შეივსება.

„ბენეფიციარებს, დღეის მდგომარეობით, გარკვეული რაოდენობის (მარაგში არსებული რაოდენობის შესაბამისად) სამკურნალო საკვები დანამატი მიღებული აქვთ. ტენდერები დასრულებულია, ხელშეკრულება გაფორმებული, პროდუქცია არის ტრანსპორტირების ეტაპზე. უახლოეს დღეებში შეივსება მარაგი და გაცემა მოხდება ჩვეულ რეჟიმში” – გვითხრეს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროში.

რაც შეეხება თავად დიაგნოზს, ფენილკეტონურია არომატული ნახშირწყლების ცვლის გენეტიკური დეფექტია. ფენილკეტონურიის დროს ბავშვის ორგანიზმში იმ ფერმენტის დეფიციტია, რომელმაც ერთ-ერთი ამინმჟავა, ფენილალანინი, უნდა გარდაქმნას და კვების ენერგეტიკულ ჯაჭვში ჩააბას. ამის გამო ფენილალანინი სრულად ვერ იხარჯება და სისხლში გროვდება. ორგანიზმი ცდილობს, ზედმეტი ფენილალანინისგან გათავისუფლდეს და მას არასწორი გზით შლის, ამ დროს წარმოქმნილი ნახევარდაშლის პროდუქტები კი ორგანიზმისთვის ტოქსიკურია და სხვადასხვა პათოლოგიას იწვევს. 

“მედიაცენტრი მთავარის” მასალის გამოყენების შემთხვევაში, აუცილებელია, მიუთითოთ ბმული და წყარო.

მსგავსი თემები