ბათუმის სასწრაფო სამედიცინო დახმარების ორი ჯგუფი, სულ 6 ადამიანი, კარანტინშია გადაყვანილი. მათ შეხება ჰქონდათ ქალთან, რომელსაც დღეს, 7 აპრილს, კორონავირუსი დაუდგინდა.
„ამ წუთას ჩვენი ექვსი თანამშრომელია კარანტინში და უტარდებათ შესაბამისი ტესტირება კორონავირუსზე. ორჯერ იყო ბრიგადა გამოძახებაზე გასული, შესაბამისად ორ ბრიგადას ჰქონდა შეხება პაციენტთან,“ – ამბობს მინდია კახიძე, საგანგებო სიტუაციების, კოორდინაციისა და გადაუდებელი დახმარების ცენტრის წარმომადგენელი ბათუმში.
„ბათუმელების“ კითხვაზე, არიან თუ არა სასწრაფო დახმარების ბრიგადები სპეციალური ფორმებით აღჭურვილები, მინდია კახიძე პასუხობს რომ კი.
„C დონის აღჭურვა გააჩნია ყველა ბრიგადას. უბრალოდ ეს აღჭურვილობა გამოიყენება გრიპისმაგვარ დაავადებებთან. მაგრამ იმ შემთხვევაში, როცა ადამიანი არანაირ სიმპტომატიკას არ აფიქსირებს, პაციენტებთან სპეცფორმით არ მიდიან. თუმცა ხელთათმანი, ნიღაბი, სათვალე, ფარი, ყველას აქვს.
რაც შეეხება ამ კონკრეტულ შემთხვევას, ამ პაციენტთან სპეცფორმით არ მისულან და არც უნდა მისულიყვნენ. იმიტომ, რომ ქალბატონმა, როდესაც დარეკა 112-ში, თქვა, რომ არ ყოფილა უცხოეთში, ამასთან არც ტემპერატურა ჰქონდა, არც ხველა, არც სურდო. არაფერი არ უთქვამს ისეთი, რაც ვირუსის სიმპტომატიკასთან იყო დაკავშირებული. ნაღვლის ბუშტის პრობლემა მაქვს, ელენთა მაწუხებსო, ასე თქვა,“ – ამბობს მინდია კახიძე.
მისივე თქმით, სასწრაფო დახმარების ბრიგადებს სხვა კოლეგებთან შეხება არ ჰქონიათ. სასწრაფოს ექიმები გუშინ, 6 აპრილს, გადაიყვანეს კარანტინში. აქვთ თუ არა მათ კორონავირუსი, დღეს, 7 აპრილს, საღამოს გახდება ცნობილი.
გარდა სასწრაფო დახმარების ბრიგადებისა, კარანტინშია კლინიკა “მედინას” რამდენიმე თანამშრომელიც. სასწრაფომ ქალი, რომელსაც კორონავირუსი დაუდასტურდა, სწორედ ამ კლინიკაში მიიყვანა.
