“აუცილებელი ხომ არ არის ანწუხელიძესა და ტატუნაშვილივით მოექცნენ ვაჟა გაფრინდაშვილს ჩვენი ერის მტრები, რომ მისი გმირად აღიარება ჩვენსავე შეგნებაში სიღრმისეულად მოხდეს…”- ამის შესახებ მუსიკოსი, ნიკოლოზ რაჭველი სოციალურ ქსელში წერს და ვაჟა გარფრინდაშვილის უაკნონო პატიმრობას კიდევ ერთხელ ეხმიანება.
„ძალიან ხშირად, არაერთხელ დღეების, კვირების განმავლობაში ვფიქრობ რა შეიძლება გავაკეთო მე, ერთმა ადამიანმა, თუნდაც პროფესიის და წარმატების გამო ფართო საზოგადოებისთვის ცნობილმა ჩვენი დროის ნამდვილი გმირის ვაჟა გაფრინდაშვილის მხარდასაჭერად… მხოლოდ მოწოდება “თავისუფლება ვაჟა ექიმს“ საკმარისად აღარ მეჩვენება, მაგრამ ვერც ვერაფერს ვიგონებ ახალს… ლიზა ბათიაშვილთან და ქეთი მელუასთან ერთად მეც მივეცი ინტერვიუ მსოფლიოს ერთ-ერთ წამყვან გაზეთს “The Guardian”, რომელიც მალე გამოვა, მაგრამ მსოფლიო პრესა და საერთაშორისო პოლიტიკური საზოგადოება ხომ ისედაც ბევრს საუბრობდა ამ საკითხზე და ჯერჯერობით უშედეგოდ…
ჩვენ დროითი დისტანცია გვაშორებს ქართველ გმირებთან, რომელსაც სკოლაში ისტორიის გაკვეთილებზე მასწავლებლები გვაცნობდნენ, პატრიოტობითა და ღირსებით ნაკარნახებ მათ შეუპოვრობას და მედგრობას სამაგალითო ამბებად გვინერგავდნენ და ახლა იმდენ საერთოს ვხედავ მათსა და ვაჟა ექიმს შორის, რომ ასე მგონია ცოცხალ წმინდანზე მაქვს საუბარი და თანაგრძნობის განცდა… აუცილებელი ხომ არ არის ანწუხელიძესა და ტატუნაშვილივით მოექცნენ ვაჟა გაფრინდაშვილს ჩვენი ერის მტრები, რომ მისი გმირად აღიარება ჩვენსავე შეგნებაში სიღრმისეულად მოხდეს…
ღმერთმა დაიფაროს და მალე დაუბრუნოს თავის ოჯახს და არა თავის სამშობლოს, რადგან მან თუ არა აბა სხვა ვინ იცის, რომ ის ახლა უსამართლო სასჯელს სწორედ რომ თავის სამშობლოში იხდის…“,- წერს ნიკოლოზ რაჭველი.
