“აპრილში შეიძლება უკვე მზად იყოს ახალი კორონავირუსის პირველი ვაქცინა „ – ჩინეთის ჯანდაცვის კომისია

ჩინეთის ჯანდაცვის ეროვნული კომისიის განცხადებით, აპრილში შეიძლება უკვე მზად იყოს ახალი კორონავირუსის პირველი ვაქცინა „გადაუდებელი გამოყენებისთვის“.

ჩინეთის ჯანდაცვის სექტორის ხელმძღვანელთა განცხადებით, ქვეყანა სრული ძალებით არის გადართული ახალი კორონავირუსის საწინააღმდეგო ვაქცინის შექმნაზე. ვირუსით მსოფლიოში უკვე 100 000-ზე მეტი ადამიანია ინფიცირებული, 3000-ზე მეტი კი გარდაცვლილი.

„ჩვენი შეფასებით, იმედი გვაქვს, რომ აპრილში გარკვეული ვაქცინები კლინიკური ცდის ეტაპზე გადავა ანდაც მზად იქნება საგანგებო სიტუაციებში გამოყენებისთვის“, — ამბობს ჩინეთის ჯანდაცვის ეროვნული კომისიის მეცნიერებისა და განვითარების ცენტრის დირექტორი ჟენგ ჟონგვეი.

მისივე თქმით, პროცესში ჩართულია ვაქცინების კვლევის ათეულობით ჩინური დაწესებულება და მიმდინარეობს სხვადასხვა ტიპის ვაქცინებზე მუშაობა.

უსაფრთხო და ეფექტიანი ვაქცინების შექმნას სჭირდება დრო, ინვესტირება და კარგი მეცნიერები. დაავადება COVID-19-ის გამომწვევ და მის მსგავს კორონავირუსთა შემთხვევაში, ეს პროცესი კიდევ უფრო მეტი გამოწვევითაა სავსე. ექსპერტთა განცხადებით, მხოლოდ უსაფრთხოებასა და ეფექტიანობაზე ტესტირებას 12-18 თვე ან მეტი სჭირდება.

ჩინეთის კანონმდებლობით, შესაძლებელია საზოგადოებრივი ჯანდაცვის საგანგებო მდგომარეობებისათვის შექმნილი ვაქცინების გადაუდებელი გამოყენება სპეციფიკური პირობებით. თუმცა, ამისათვის საჭიროა, სამედიცინო პროდუქტების ეროვნულმა ადმინისტრაციამ ჩათვალოს, რომ მკურნალობის შედეგები რისკებს გადაწონის.

ჟენგ ჟონგვეი არ აკონკრეტებს, რა პირობებში შეიძლება მოხდეს ვაქცინის გამოყენება ადამიანებში.

თებერვლის დასაწყისში, ჩინეთმა მსოფლიოს ამცნო, რომ ვაქცინის კლინიკური ცდება შეიძლება აპრილში დაიწყოს.

ახალი კორონავირუსის ვაქცინებზე მუშაობა მთელ მსოფლიოში რეკორდული სიჩქარით მიმდინარეობს. ცოტა ხნის წინ ცნობილი გახდა, რომ ამერიკულმა ბიოტექნოლოგიურმა კომპანია Moderna-მ ადამიანებზე ტესტირებისათვის აშშ-ის ალერგიისა და ინფექციურ დაავადებათა ეროვნულ ინსტიტუტს უკვე გადასცა მის მიერ შექმნილი ვაქცინა.

ამავე ინსტიტუტის დირექტორის, დოქტორ ენტონი ფოსის განცხადებით, მთელი ეს პროცესი, მათ შორის ვაქცინის ეფექტიანობის დადასტურება და წარმოების უფლების მოპოვება, დაახლოებით ერთ წელიწადს გასტანს.

მსგავსი თემები