„შეხვედრამ აჩვენა, რომ ე.წ გერმანული მოდელი არ არის შესაბამისობაში კონსტიტუციასთან” – არჩილ თალაკვაძე

„შეხვედრამ კიდევ ერთხელ ცხადად აჩვენა, რომ ე.წ გერმანული მოდელი არ არის შესაბამისობაში კონსტიტუციასთან და  იმ ფორმით და იმ ინიციატივით, როგორც ეს ჰქონდა წარმოდგენილი ოპოზიციას, შეუძლებელია მისი განხორციელება“, – ამის შესახებ საქართველოს პარლამენტის თავმჯდომარემ მიმდინარე პოლიტიკურ პროცესებთან დაკავშირებით, მმართველი პარტიის, საპარლამენტო და არასაპარლამენტო ოპოზიციის, ასევე, დიპლომატიური კორპუსის წარმომადგენლებს შორის გამართული შეხვედრის დასრულების შემდეგ განაცხადა.

არჩილ თალაკვაძის თქმით, დღეს გამართულ შეხვედრაზე სხვა პოლიტიკურ საკითხებზეც იმსჯელეს და გამოჩნდა, რომ თავად ოპოზიცია არ არის შეთანხმებული ყველა იმ საკითხთან დაკავშირებით, რომელიც აღნიშნულ ფორმატში წამოიჭრა.

„შესაბამისად, არ გამოვრიცხავთ, რომ მომავალში კიდევ შედგეს ასეთი პოლიტიკური კონსულტაციები. ჩვენ, როგორც დღეს, ასევე მომავალშიც, მზად ვართ პოლიტიკური კონსულტაციების გასაგრძელებლად“ ,- აღნიშნა პარლამენტის თავმჯდომარემ.

არჩილ თალაკვაძემ განმარტა, რომ შეხვედრის მიზანი, საერთაშორისო საზოგადოებისა და ვენეციის კომისიის წარმომადგენლების თანდასწრებით, იმის  არგუმენტირებული ჩვენება იყო, რომ გერმანული მოდელი საკონსტიტუციო ცვლილებებს მოითხოვს. 

„ჩვენც გულდაწყვეტილები ვართ, რომ ეს გადასვლა ვერ მოხდა, თუმცა, ყველამ უნდა მიიღოს, რომ ეს არის პარლამენტის გადაწყვეტილება. უნდა გავაგრძელოთ  მოძრაობა. თარიღის შეცვლის გადაწყვეტილებაზე საკმარისი ხმები რომ ვერ მოგროვდა, ეს არ არის პოლიტიკური პროცესის შეწყვეტა, ეს არ ნიშნავს იმას, რომ ქვეყანა ასრულებს დემოკრატიულ განვითარებას. ჩვენ რასაც ვგეგმავთ არის, რომ მოვემზადოთ 2020 წლის არჩევნებისთვის, მას აუცილებლად დემოკრატიულად და გამჭვირვალედ ჩავატარებთ და გარკვეული პასუხისმგებლობა 2020 წლის არჩევნებზე ოპოზიციურმა პარტიებმაც უნდა აიღონ“,- განაცხადა არჩილ თალაკვაძემ.

პარლამენტის თავმჯდომარის თქმით, შესაძლოა, მომდევნო კონსულტაციებზე ვითარების საკანონმდებლო დონეზე გაუმჯობესების სხვა შესაძლებლობები განიხილონ.

„თუ რა გაუმჯობესების შესაძლებლობაა უკვე საკანონმდებლო დონეზე, იმიტომ, რომ დღეს კიდევ ერთხელ ვნახეთ, რომ გერმანული მოდელი არ არის შესაბამისი საქართველოს კონსტიტუციასთან – ამაზე მომდევნო კონსულტაციებში, შესაძლოა, კიდევ დავხარჯოთ დრო. დღესაც გამოვთქვით მზადყოფნა  პოლიტიკური კონსულტაციებისთვის. თავიდანვე, რამდენჯერმე მოვუწოდეთ ოპოზიციას, რომ დავუბრუნდეთ ნორმალურ პოლიტიკურ პროცესს, დავუბრუნდეთ პოლიტიკურ განხილვებს და დისკუსიებს. ამისთვის მზად  ვიქნებით მომავალშიც“,- განაცხადა არჩილ თალაკვაძემ.

პარლამენტის თავმჯდომარის შეფასებით,  შეხვედრაზე დამსწრეთა კუთხით, დაცული იყო ბალანსი, ხოლო რაც შეეხება აქტივისტებს, მისი განმარტებით, ეს არის ფორმატი, სადაც მხოლოდ პოლიტიკური პარტიების წარმომადგენლები და საერთაშორისო პარტნიორები იღებენ მონაწილეობას. 

„პოლიტიკური შეთანხმებების მიღწევა შესაძლებელია მხოლოდ პოლიტიკურ ფორმატებში და დღეს საერთაშორისო საზოგადოებამ კიდევ ერთხელ დაადასტურა. ასე რომ, ჩვენ მზად ვართ მომდევნო პოლიტიკური კონსულტაციებისთვის, სადაც უკვე ალბათ სხვა საკითხებს განვიხილავთ“,- განაცხადა პარლამენტის თავმჯდომარემ.

მსგავსი თემები

One Thought to “„შეხვედრამ აჩვენა, რომ ე.წ გერმანული მოდელი არ არის შესაბამისობაში კონსტიტუციასთან” – არჩილ თალაკვაძე”

  1. I don’t even know how I ended up here, but I thought this post was good.
    I do not know who you are but definitely you are going to a famous blogger if you aren’t already ;
    ) Cheers!