„საკუთარ თავს დააზიანებს კონკრეტული კერძო სკოლა, თუ არ მიიღებს შესაბამის გადაწყვეტილებას, რაც მორალიდან მომდინარეობს“ – ეს განცხადება პარლამენტის განათლების, მეცნიერებსა და კულტურის კომიტეტის თავმჯდომარე გენადი მარგველაშვილმა „მედიაცენტრ მთავართან“ ინტერვიუში განაცხადა.
განახლდება თუ არა სექტემბერში სასწავლო პროცესი; რატომ ახდევინებენ კერძო სკოლები მშობლებს სწავლების სრულ საფასურს და ვისი პრეროგატივაა ამ პრობლემის მოგვარება; არის თუ არა ადგილები საჯარო სკოლებში? – ამ და სხვა საინტერესო საკითხებზე ,,მედიაცენტრ მთავარს’’ გენადი მარგველაშვილმა ესაუბრა.
„მედიაცენტრი მთავარი“: ბატონო გენადი, მართალია, განათლების მინისტრმა წარმოადგინა განათლების სისტემის მიმართულების პრეზენტაცია, თუმცა ბევრი კითხვა ისევ პასუხგაუცემელია. როგორია თქვენი ზოგადი შეფასება იმასთან დაკავშირებით, რაც მოვისმინეთ?
გენადი მარგველაშვილი: მინისტრმა რაც წარმოადგინა, ეს იყო ზოგადი შეფასება, რადგან ერთ საათში ყველაფერს ვერ ჩაატევდა. ერთ საათში განათლების ყველა საფეხური ვერ ჩაეტეოდა, ეს ბუნებრივია, ამიტომ, გეგმა ყველა მიმართულებით დეტალურად ჩაიშლება. მთავარია, სწორად დაწყებული პრევენციული ზომები სწორად გაგრძელდეს. განათლების სამინისტროს სწორი ნაბიჯებიდან გამომდინარე, ძირითადი და მთავარი მიზანი მიღწეულია. შეიძლება ბევრი კითხვა არსებობდეს, ამ კითხვებზე სწორი პასუხებიც არის, თუმცა, ამ ერთ საათში ვერ მოესწრებოდა ყველაფერზე საუბარი.
,,მედიაცენტრი მთავარი’’: გასაგებია, თუ ყველაზე კითხვაზე პასუხები არსებობს, გკითხავთ ერთ საკითხზე, რომელიც ათეულობით მშობელს აწუხებს და ეს ეხება კერძო სკოლებს. კერძოდ, პანდემიის გამო, ბევრმა ადამიანმა დაკარგა სამსახური, ნაწილი უხელფასო შვებულებაშიც გაუშვეს. კერძო სკოლები, მიუხედავდ იმისა, რომ ადმინისტრაციული, კომუნალური, კვების თუ სხვა ხარჯები შეუმცირდათ, მშობლებისგან სრულად ითხოვენ სწავლის საფასურის გადახდას, ნულოვანი შეღავათით. როგორი უყურებთ მსგავს მიდგომას?
გენადი მარგველაშვილი: მიუღებელია, ამას პირდაპირ გეტყვით. მსგავსი მიდგომა ჩემთვის მიუღებელია. დისტანციური სწავლების ძირითადი აქცენტები და სიმძიმე გადატანილია იმ მიმართულებაზე,რომელსაც სამინისტრო და ტელესკოლა ჰქვია. თუნდაც ამის გამო უნდა ყოფილიყო შემსუბუქებული გადასახადების ნიხრი, სხვა რამეს რომ თავი დავანებოთ. მე ამ თემაზე მინისტრთან მქონდა საუბარი. ტელესკოლა მთავრობისა და პირველი არხის პროდუქტია და ის ყველასთვის ხელმისაწვდომია, კერძო სკოლები კი არ იქცევიან სწორად, როცა სოლიდარობას არ იჩენენ და ფინანსურ პოლიტიკას არ ცვლიან.
,,მედიაცენტრი მთავარი’’: კერძო სკოლები გაკვეთილებს სხვადასხვა პლათფორმის გამოყენებით ატარებენ. მაგალითად „სკაიპი“ და იცით, რომ სრული გაკვეთილების ნაცვლად ტარდება ნახევარი გაკვეთილი. ამას გარდა, არიან მშობლები,რომლებსაც ჰყავთ ერთზე მეტი შვილი და ყველას არ აქვს შესაძლებლობა, სამივე შვილს სათითაოდ უყიდოს კომპიუტერი, რომ მათი შვილები სხვებთან თანაბარ პირობებში აღმოჩდნენ…
გენადი მარგველაშვილი: აბსოლუტურად გეთანხმებით. ზუსტად იგივე პოზიცია მექნებოდა რასაც თქვენ ამბობთ. მე პირადად ყველას მოვუწოდებ, ყველა კერძო სკოლას, რომ კეთილი ინებონ და გადახედონ თავის ფინანსურ პოლიტიკას. საერთო ჯამში სამომავლოდ საზოგადოების მხრიდან მათი ქმედება უნდა იყოს სწორი და მართებული.
,,მედიაცენტრი მთავარი’’: ბევრი მშობელი, რადგანაც პანდემიის გამო სწავლის საფასურს გადასახადს ვერ იხდიდა, მიიღო გადაწყვეტილება, რომ ბავშვები საჯარო სკოლებში გადაეყვანა. თუმცა, აქ მეორე პრობლემა წარმოიშვა, საჯარო სკოლები გადავსებულია და ადგილი აღარ არის. ვინც ადგილი იპოვა, კერძოს სკოლიდან ბავშვის საბუთების წაღების პრობლემა შეექმნა. სანამ თანხას სრულად არ დაფარავენ, სკოლის ადმინისტრაციიის ტყვეობაში არიან. რა უნდა ქნას მშობელმა?
გენადი მარგველაშვილი: მსგავსი გამოწვევა რა თქმა უნდა მსმენია. ისიც ვიცი, რომ საჯარო სკოლები გადავსებულია. ეს არის ისეთი კაბალური სიტუაცია, როცა სასამართლოს ჩართულობაა საჭირო. შესაძლებელია, სწორედ სასამართლოს ძალით დარეგულირდეს საკითხი. პრეროგატივა ამ მიმართულებით სწორედ სასამართლოს ეკუთვნის. მთავარია, რომ არცერთ შემთხვევაში არ უნდა დაიჩაგროს ბავშვის უფლებები, რომელსაც განათლების უფლება ჰქვია და კონსტიტუციაში გვიწერია. სწავლის უწყვეტობა და თანაბარ პირობებში ყოფნა გარანტირებული უნდა იყოს. აქ თუ ბავშვმა იმაზე იფიქრა, ჩემი მშობელი თუ ფულს ვერ გადაიხდის რა მეშველება, მაშინ იმ ტიპის შემთხვევას მივიღებთ, რაც ცოტა ხნის უკან ერთ-ერთ კერძო სკოლაში მოხდა და რაც ყველასთვის მიუღებელია. ბავშვის უფლებები არ უნდა დაიჩაგროს, ეს კონსტიტუციით გარანტირებული უფლებაა. მსგავს შემთხვევებში, სასამართლოს ალტერნატივა არ აქვს.
,,მედიაცენტრი მთავარი’’: მშობლები,რომლებსაც არ აქვთ შესაძლებლობა და ვერ იხდიან სწავლის საფასურს, საჯარო სკოლებში კი ადგილები არ არის, როგორ უნდა მოიქცნენ ამ შემთხვევაში ისინი? სად არის აქ სახელმწიფოს როლი?
გენადი მარგველაშვილი: საჯარო სკოლებში ადგილები არის, თუმცა, აქ საუბრია ე.წ. პრესტიჟულ საჯარო სკოლებზე, სადაც ადგილები არ არის. ახალი ეროვნული სასწავლო გეგმა და ახალი სკოლის პროექტი გულისხმობს სწორედ ხარისხის მაღალი განვითარების თვალსაზრისით სკოლების გათანაბრებას. ვფიქრობ, რომ ლაკმუსის ქაღალდივით გამოვიდა პანდემიის პრობლემა, ტელესკოლამ და დისტანციურმა სწავლებამ მოგვცა შესაძლებლობა, ყველა მოსწავლეს თანაბრად მიეწოდოს პროდუქტი რაც ძალიან კარგია. სკოლებში სწავლება უნდა იყოს მაღალი ხარისხის, რომ ბავშვებს სკოლაში წასვლა უხაროდეს. შეიძლება რამდენიმე სკოლა დამისახელოთ, სადაც ყველას უნდა რომ მოხვდეს, თუმცა, ამავდროულად, არსებობენ სკოლები, სადაც ადგილები ცარიელია.
,,მედიაცენტრი მთავარი’ : თქვენ აღნიშნეთ, რომ მშობლებსა და კერძო სკოლას შორის ურთიერთობა არის ხელშეკრულების საგანი. როცა პრემიერ მინისტრმა გარკვეული შეზღუდვები დააწესა,მან ბიზნესსაც კი სთხოვა მაღალი სამოქალაქო პასუხისმგებლობის გამოჩენა. ანალოგიურად, შეეძლო თუ არა განათლების სამინისტროს რეკომენდაცია მიეცა კერძო სკოლებისთვისაც, რომ გაეთვალისწინებინათ ეს მდგომარეობა და გარკვეულ შეღავათზე წასულიყვნენ?
გენადი მარგველაშვილი: რამდენადაც მე ვიცი, ამ ტიპის მითითება არსებობს, მაგრამ ვიმეორებ, ეს არის მათ კეთილ ნებაზე და შემდეგ იმ პრესტიჟზე დამოკიდებული – თუ რას მიაღწევს ამით კერძო სკოლა, უფრო დაწვრილებით დეტალებში მე ვერ ჩავუღრმავდები. მე თქვენ ვერ გაიძულებთ იყოთ გმირი. ეს უკვე შეგნების საკითხია.
საკუთარ თავს დააზიანებს კონკრეტული კერძო სკოლა, თუ არ მიიღებს შესაბამის გადაწყვეტილებას, რაც მორალიდან მომდინარეობს.
,,მედიაცენტრი მთავარი’’: როგორ ფიქრობთ ჩვეულ რეჟიმში განახლდება თუ არა სექტემბერში სწავლა?
გენადი მარგველაშვილი: ეს არის თითოეულ ჩვენგანზე დამოკიდებული. თუ სწორად გავითვალისწინებთ და გავითავისებთ იმ დირექტივებს – სიტუაცია საგანგებო აღარ იქნება, თუმცა ეს არ ნიშნავს რომ ყველაფერი გაიხსნება. შეზღუდვები გაგრძელდება, იმისათვის რომ ჩვენი მოსახლეობის ჯანმრთელობა იყოს დაცული. მზადყოფნაში უნდა ვიყოთ და ყველაფერი ისე იქნება როგორც ჩვენ გვინდა.
გარდა ამისა, დისტანციური სწავლება თუ ტელესკოლა – უნდა გამოვიყენოთ შემდეგშიც სისტემატიურად და გავაუმჯობესოთ. სამინისტრო მზად არის გამოაცხადოს კონკურსები ინოვაციებისთვის, რომ რაც შეიძლება ახალი და მძლავრი რესურსები მივიღოთ ამ მიმართულებით.
,,მედიაცენტრი მთავარი’’: თუმცა, ბუნებრივია, რომ ელექტრონული სწავლება ისეთი შედეგიანი და ხარისხიანი ვერ არის როგორც სკოლაში…
გენადი მარგველაშვილი: გეთანხმებით, თუმცა, იქნება. ეს არის პირველი გამოწვევა, ჩვენ გვეგონა რომ საერთოდ ვერავითარ შედეგს ვერ მივიღებდი, მაგრამ ახლა არის საძიებელი, სად ვერ მივიღეთ შედეგი, სად არის გამოწვევა, მაინც არის საჭირო ინდივიდუალური სასწავლო გეგმა.
,,მედიაცენტრი მთავარი’’: თუნდაც კომპიუტერთან მიჯაჭვულობა, ოთახში ჩაკეტილობა, გარეთ გაუსვლელობა – ეს ხომ ბავშვებისთვის სერიოზული პრობლემაა?
გენადი მარგველაშვილი: გეთანხმებით ამაში, ბავშვებს სკოლები და მეგობრები ენატრებათ, ურთიერთობები ენატრებათ და ეს ელექტრონულად ვერ შეივსება. იმედი გვაქვს, მალე ყველაფერი ჩვეულ რეჟიმს დაუბრუნდება. ინდივიდუალური სასწავლო გეგმა მაინც არის საჭირო მოსწავლეებისთვის, რომ ყურადღების გარეშე არ დარჩნენ.
ელენე ბერძენიშვილი
