„ქვეყანაში, სადაც განათლება პრიორიტეტი არ არის, სიღარიბის დაძლევა შეუძლებელია“

საპარლამენტო უმრავლესობის წევრი დიმიტრი ხუნდაძე განათლების სფეროში პრემიერ-მინისტრის ახალ ინიციატივას ეხმაურება და აცხადებს, რომ ეს უპრეცედენტო შემთხვევაა და ქვეყანაში, სადაც განათლება არ არის პრიორიტეტი, სოციალური მდგომარეობის გაუმჯობესება შეუძლებელია.

დეპუტატი თვლის, რომ დღეს სახელმწიფოს პრიორიტეტები სწორად არის შერჩეული და ეს არის ქვეყნის გრძელვადიანი განვითარების პერსპექტივა.

„როდესაც ქვეყანაში სოციალური მდგომარეობის გაუმჯობესებაზე და სიღარიბის დაძლევაზე ვსაუბროთ, თუ რა დახმარებები უნდა გაიღოს სახელმწიფომ, აუცილებელია, უპირველეს ყოვლისა განათლების დონის ამაღლებაზეც ვიზრუნოთ. სწორედ ეს გვაძლევს გრძელვადიან შედეგს და არა ერთჯერადი სოციალური დახმარებები. მიუხედავად იმისა, რომ დღეს მძიმე სოციალური ფონია საქართველოში, სწორი გადაწყვეტილებაა, რომ სოლიდური თანხები განათლებაში წავიდა. ჯერ ასეთი პრეცედენტი საქართველოში არ ყოფილა. ჩვენ ვერასოდეს წავალთ წინ, თუ არ ვიფიქრეთ გრძელვადიან პერსპექტივაზე. ეს არ ნიშნავს იმას, რომ გაჭირვებულს არ უნდა დავეხმაროთ, უნდა დავეხმაროთ, ოღონდ ფინანსებთან ერთად, ცოდნის მიცემით,“ – აცხადებს დეპუტატი.

ხუნდაძის შეფასებით, თუ მხოლოდ დღევანდელ დღეზე ვიფიქრებთ, წარმატებული ხალინდელი დრე არ დადგება: „დღეს დამსაქმებლები მხოლოდ კვალიფიციურ კადრებს მოითხოვენ, იქნება ეს უმაღლესი განათლებით თუ პროფესიული ცოდნით. სწორედ ეს ცოდნა განაპირობებს ქვეყნის ეკონომიკურ სიძლიერეს, რაც თავისთავად პოზიტიურად ცვლის სოციალურ ფონს. მართალია, განათლების შედეგად მიღებული ძლიერი ეკონომიკა და სოციალური მდგომარეობა ხანგრძლივ დროს მოითხოვს, მაგრამ თუ მხოლოდ დღევანდელზე ვიფიქრეთ, წარმატებული ხვალინდელი დღე ვერასოდეს დადგება.“

მსგავსი თემები