ისრაელში მცხოვრები ქართველი ემიგრანტი, ინტერნეტსახელით Annushka kol სოციალურ ქსელში კანაფის ლეგალიზაციის თემას ეხმიანება და იმ ადამიანებს მიმართავს, ვისაც ნარკოტიკული თრობის ქვეშ მყოფი ახლობელი არ უნახავს და ეს პრობლემა საკუთარ თავზე არ გამოუცდია.
„არ ვიცი რა ხდება საქართველოში… ვერ გავიგე ზუსტად, მაგრამ ვხვდები, ვხვდები, რომ ზოგი ნარკოტიკების ლეგალიზაციის მომხრეა, ზოგიც არა…
ორივე მხარესთან მაქვს კითხვები:
თქვენ ნარკომანი მშობელი გყოლიათ?
შვილი? ძმა? დედა? და? მეუღლე? .
თქვენ ნარკომანთან შეხება გქონიათ? .
თქვენ გამოგიცდიათ ის კანკალი, როდესაც ნარკომანი ტელეფონს არ პასუხობს?
წარმოგიდგენიათ აზრებში, რომ ის შეიძლება სადმე ახლა სარდაფში ეგდოს, ზედმეტი დოზისგან კომაში?
მდგარხართ ამ კომაში მყოფი, ჰეროინის ზედმეტი დოზის გამო ხელოვნური სუნთქვის აპარატზე მიერთებული ნარკომანის საწოლთან 40 დღე?
თქვენ გითევიათ ღამეები ამ ნარკომანის საწოლის გვერდზე, როცა მას ინფარქტი ჰქონდა კოკაინის ზედმეტი დოზისგან?
გითრევიათ იგი ინვალიდის ეტლით?
თქვენს კარზე უბრახუნებია ნარკოტიკების ბარიგების ხროვას ფულისთვის? თქვენი ნივთები გაუყიდია ნარკომანებს? სახლი?
თქვენ ამ ნარკომანთან ერთად სიკვდილის თვალებში ჩაგიხედავთ, თუნდაც ერთხელ?
ქალებო! ნარკომან ქმართან საწოლში ყოფილხართ?
კაცებო, ჰეროინით დაჯიჯგნილი ვენებით ცოლთან საწოლში ყოფილხართ?
ცოლებო! ღემე საშინელ ბრახუნზე გაგიღვიძიათ? მან ხომ ისევ გაიკეთა და დავარდა!
ქმრებო, რამდენჯერ დაგიყაჩაღებიათ საკუთარი ოჯახი წამლის ფულისთვის?!
შვილის უბედურების ყურებით მკვდარი მამა გინახავთ?
მამის დასაფლავებაზე ვენებში გაჩხერილი შვილის სახე გინახავთ?
თქვენ წამალი და სიკვდილი გინახავთ?
… მე მინახავს…
ხო და მორჩით, რა!
შიმშილის გამო ქუჩაში გამოსული ხალხი არ მინახავს საქართველოში და წამლის გამო ათასობით კაცის თავშეყრა და აღშფოთება კი ვნახე…
ბევრი რამე მინახავს!
შავოსანი დედები გინახავთ?
წამლის ქვეშ “გაპარაული” “კარგი ტიპების” შავოსანი და სახედახოკილი დედები?
რა გეწამლებათ ხალხო?
ორ მილიონამდე ემიგრანტია, მილიონ ნახევრამდე დაბოლილი გინდათ და ამ გაჭირვების მაყურებელი მოხუცები?
სხვა ყველაფერი წესრიგშია?
სხვა ყველა კანონმდებლობა მოგვარებულია? მაინც და მაინც ნარკოტიკების ლეგალიზაციაზე კანონით ვიწყებთ?
ერთხელ მაინც აკანკალებულხართ იატაკზე გაშხვერთილი მამის, ქმრის, ძმის, შვილის მნახველნი?
პატრონი მართლა საერთოდ აღარ ყოლია მაგ ქვეყანას!
რა გინდათ? პირდაპირ თქვით, რა გინდათ…
საქართველო, იმ დემოკრატიისგან და იმ ქვეყნებისგან, სადაც ნარკოტიკების ლეგალიზაციაა, ძალიან შორს დგას!
ლეგალიზაცია, რეაბილიტაცია…
გვაქვს რეაბილიტაციის ცენტრები?
შეგვიძლია მათი დაფინანსება? .
თუ მომხმარებლის ხარჯზე?
თუ სახელმწიფოს ხარჯზე? – რა ვიცი, ლეიკემიით დაავადებული ბავშვებისთვის ვერ მიუხედია ქვეყანას…
დავიწყოთ იქედან, რომ ქვეყანაში მაცხოვრებელთა 80% უსაქმურია/დაუსაქმებელია.
ეს არაა ის ვარიანტი, კაცები/ქალები დღის ბოლოს, ან საქმიან შეხვედრაზე სიგარას რომ გააბოლებენ და კონიაკს მოწრუპავენ განტვირთვისთვის!
საქართველოში სმა დ პლანი ცხოვრების წესი გახდა!
აი, ესაა უბედურება და სანამ ამ კანონამდე მივლენ, ბევრი სხვა კანონია მისახედი.
ის, რომ ცოლის მკვლელი 8-წლიან სასჯელს მიიღებს და მეზობლის ნაჯახით დამჩეხი – ცხრაწლიანს, მთვრალი მძღოლი, რომელმაც კაცი მოკლა, რომ 2 წელიწადში გამოვა ციხიდან და დაბოლილმა მძღოლმა კიდევ მოზარდი მოკლა ან დაასახიჩრა და ორ წელიწადში გამოვლენ, ან საერთოდ არ გასამართლდებიან, მგონი აქედან უნდა დაიწყონ და ხალხის დასაქმებიდან.
დიახ, კანონი! კანონი არ კანონობს ქვეყანაში..
დასაქმებული ადამიანი არ ივლის 24 საათი დაბოლილი ან ნასვამი.
რაც შეეხება, რა განსხვავებაა „ბარიგასა“ და მომხმარებელს შორის, „ბარიგა“ მოსაკლავია! კი! – უმაღლესი სასჯელი. იგი მკვლელია და წინასწარ განზრახული მკვლელობის, ერის გენოციდის მუხლით უნდა გასამართლდეს.
მომხმარებელი კი ერთგვარად, პასიური გამავრცელებელია!
ბევრი “კარგი ტიპი” მინახავს “სასტავში” თავად დაბოლილი, როგორ აწოდებს მეორეს და ”მიდი, ძმა, მოწიე, რა გეშინია, მაგარი კაიფია!”… აი, გამვრცელებელი, პასიური, ფულის გარეშე… აი, ის მეორე კი გაჩერდება თუ არა მხოლოდ მარიხუანაზე და არ გააგრძელებს- ეგ უკვე კაცმა არ იცის!
ძირითადად, ყოველთვის მხოლოდ მარიხუანით იწყება და ვენაში პირდაპირ არავინ “იჩხერს”…
დეკრიმინალიზაციაო… ქვეყანაში, სადაც მკვლელი არ ისჯება, იქ მარიხუანას მოწევაზე პრიზი უნდა იყოს!
რა გითხრათ, ბედნიერი დღე!”… – წერს ქართველი ემიგრანტი სოციალურ ქსელში.
