“დაიწყო დიდი შეტევა ეკლესიაზე და ეროვნულ ფასეულობებზეც” – საქართველოს საპატრიარქო განცხადებას აქვეყნებს

საქართველოს საპატრიარქო, ქართულ-შვედურ ფილმთან “და ჩვენ ვიცეკვეთ” დაკავშირებით განცხადებას აქვეყნებს. როგორც განცხადებაშია აღნიშნული, ამ ფილმით ბოროტი ძალა, ეკლესიაზე და ეროვნულ ფასებულობებზე შეტევას ცდილობს.

საქართველოს საპატრიარქოსთვის მიუღებელია ფილმის “და ჩვენ ვიცეკვეთ” საქართველოს კინო-თეატრებში ჩვენება და დასძენს, რომ ემიჯნება ძალადობრივ ქმედებებს.

“მედიაცენტრი მთავარი” საქართველოს საპატრიარქოს განცხადებას უცვლელად გთავაზობთ:

“დაიწყო დიდი შეტევა ეკლესიაზე და ეროვნულ ფასეულობებზეც. ბოროტი ცდილობს, შეურაცხყოს და ეჭვქვეშ დააყენოს ყოველივე ღირებული, ხალხს იდენტობა დააკარგვინოს და იმედი ჩაუკლას, თანაც ამას სიმართლისა და სიკეთის სახელი დაარქვას.

გარკვეულ ძალას, როგორც ჩანს, დიდად აწუხებს ეკლესიის ავტორიტეტი,  მოსახლეობის სიყვარული ღვთისა და  ტრადიციული ღირებებულებისადმი  და მის შესარყევად სხვადასხვა მეთოდს მიმართავს.

შემთხვევითი არ არის, რომ 31 ოქტომბრის წმინდა სინოდის სხდომის შემდეგ განვითარებული მოვლენების ფონზე ახლა ლევან აკინის ქართულ-შვედური სოდომური ფილმის, – ,,და ჩვენ ვიცეკვეთ” ჩვენება დაიგეგმა ბათუმში და თბილისის სამ კინოთეატრში. როგორც ვიცით, აქ ნაჩვენებია ახალგაზრდა მოცეკვავის ცხოვრება, რომელიც რადიკალურად იცვლება მამათმავალ მეტოქესთან  დაკავშირების  შემდეგ და სცენა ამ ფონზე ვითარდება.

ცნობილია ისიც, რომ განზრახული ჰქონდათ, ეს სიუჟეტი სუხიშვილების ანსამბლთან დაეკავშირებინათ, რაზეც მტკიცე უარი მიიღეს. შეგახსენებთ ქალბატონ ნინოს ნათქვამს: ,,მე ვთვლი, რომ ქართული ცეკვა ეროვნულობის გამომხატველია, სადაც ჩანს თავისუფლებისმოყვარე ქართველი ერი, – მამაკაცური და ვაჟკაცური. ეს ცეკვებში და მოძრაობებშია გამოვლენილი. მე არ მინდოდა ჩემს ანსამბლში გადაეღოთ ასეთი სიუჟეტის ფილმი. ეს იქნებოდა ტყუილი,.. რადგან ქართულ ცეკვაში განსაკუთრებულად ჩანს მამაკაცის დამოკიდებულება ქალის მიმართ — კდემამოსილება, ტრფობა, პატივისცემა.”

ამ პოზიციის გამო ანსამბლის ხელმძღვანელებზე დაიწყო საერთაშორისო მასშტაბის შეტევა და ზეწოლა, რაც მეტად სამწუხაროა; სამაგიეროდ ჩვენი ეროვნული ღირსების შეურაცხმყოფელ ფილმს კანის ფესტივალზე VII ადგილი მიანიჭეს, ხოლო მსახიობი ლევან გელბახიანი ამერიკული ჟურნალ “W” -ს მიერ ამ ფესტივალის 15 კინოვარსკვლავთა შორის დასახელდა.

რა თქმა უნდა, ყოველივე ეს, პირველ რიგში, გაკეთდა იმისთვის, რომ შეცვალონ ჩვენი ხალხის ცნობიერება, დააცხრონ ლგბტ ურთიერთობისადმი საზოგადოებაში არსებული  უარყოფითი მუხტი და საბოლოო ჯამში მიაღწიონ ამ ცოდვის ლეგალიზებას.

საქართველოს მართლმადიდებელი ეკლესია ყოველთვის იყო, არის და იქნება კატეგორიულად შეურიგებელი როგორც საერთოდ ცოდვის, ისე, მითუმეტეს, სოდომური  ურთიერთობების პოპულარიზაციისა და დაკანონებისადმი. ამიტომაც ყოვლად მიუღებლად მიგვაჩნია ასეთი ფილმის კინო-თეატრებში ჩვენება.

ამასთან დავძენთ, რომ როგორც ადრე, ამჟამადაც, რა თქმა უნდა,  ჩვენის მხრივ, ვემიჯნებით ძალადობას და ძალადობრივ ქმედებებს,” – ნათვამია საპატრიარქოს განცხადებაში.

შეგახსენებთ, რომ „ქართული მარშის“ დამფუძნებელმა და ერთ-ერთმა ლიდერმა სანდრო ბრეგაძემ, “მედიაცენტრ მთავარში” გამართულ პრესკონფერენციაზე, საქართველოს საპატრიარქოსა და სინოდს თხოვნით მიმართა, მრევლს მოუწოდონ, 8 ნოემბერს ქუჩაში გამოვიდნენ და ოსკარზე წარდგენილი ფილმი „და ჩვენ ვიცეკვეთ“ პრეზენტაცია ჩაშალონ.

ფილმის პრემიერა საქართველოს კინო-თეატრებში 8 ნოემბერს გაიმართება. ქართული საზოგადოების გარკვეული ნაწილი, ფილმის კინოთეატრებში ჩვენების წინააღმდეგია და სეანსების ჩაშლას გეგმავს.

მსგავსი თემები