გარემოს დაცვისა და სოფლის მეურნეობის სამინისტრო ჰაერის ხარისხთან დაკავშირებით აუდიტის ანგარიშს არ ეთანხმება და აცხადებს, რომ რეკომენდაციების უმეტესობა უკვე შესრულებულია.
ანგარიში კი დედაქალაქში ჰაერის დაბინძურებას ეხება. კერძოდ, მის მიხედვით, 2017 წელს საქართველოს დედაქალაქში პრობლემურ დამაბინძურებლებს მიწისპირა ოზონი (O3), გოგირდის დიოქსიდი (SO2) და ნახშირჟანგი (CO) წარმოადგენდა.
ჰაერის ხარისხის შესახებ ერთობლივი აუდიტის ანგარიშში მოცემული ინფორმაციისა და რეკომენდაციების შესახებ საქართველოს გარემოს დაცვისა და სოფლის მეურნეობის სამინისტრო „მედიაცენტრ მტავართან“ რამდენიმე განმარტებას აკეთებს. მათი განცხადებით, უმაღლესი აუდიტორული ორგანოების ევროპული ორგანიზაციის გარემოსდაცვითი აუდიტის სამუშაო ჯგუფის მიერ მომზადებული და 2018 წლის 31 იანვარს დამტკიცებული ჰაერის ხარისხის შესახებ ერთობლივი აუდიტის ანგარიში 2017 წლის კვლევებს ეფუძნება.
როგორც გარემოს დაცვისა და სოფლის მეურნეობის სამინისტროში განმარტავენ, ანგარიშში წარმოდგენილი რეკომენდაციების უმეტესობა დღეისათვის უკვე შესრულებულია.
„2018 წელს, ოფიციალურად დამტკიცდა და ვადების შესაბამისად ხორციელდება გარემოს დაცვის მოქმედებათა მესამე ეროვნული პროგრამა; 2018 წლის 27 ივლისს დამტკიცდა ევროკავშირის სტანდარტების შესაბამისი ჰაერის ხარისხის ეროვნული სტანდარტები; 1 აგვისტოდან ეს სტანდარტები ქვეყანაში ოფიციალურად ამოქმედდა; უმჯობესდება ატმოსფერული ჰაერის ხარისხის მონიტორინგის ქსელი; რუსთავში უკვე გაიხსნა ერთი ახალი სადგური; აპრილში თბილსს დაემატება კიდევ ერთი ავტომატური სადგური; სადგური გაიხსნება კასპშიც;
იტალიის მთავრობის მხარდაჭერით, მიმდინარე და მომავალ წელს ქვეყნის მონიტორინგის ქსელს 5 ახალი სადგური დაემატება;
ატმოსფერული ჰაერის მდგომარეობის შესახებ მოსახლეობის დროულად, უწყვეტად და მარტივი ფორმით ინფორმირების მიზნით, შეიქმნა სპეციალური ვებპორტალი: air.gov.ge; გარემოსდაცვითი ინფორმაციისა და განათლების ცენტრმა შეიმუშავა და ახორციელებს ჰაერის დაცვის თემაზე საზოგადოებრივი ცნობიერების ამაღლების გეგმას; გაუმჯობესდა უწყებათშორისი კომუნიკაცია, რომლის კიდევ უფრო გააქტიურების მიზნით იქმნება შესაბამისი თემატური უწყებათშორისი კომისია“ – აცხადებენ სამინისტროში.
რაც შეეხება რეკომენდაციას ატმოსფერული ჰაერის ხარისხის მოდელირებისა და პროგნოზირების სისტემის შექნის შესახებ, მათივე განმარტევით, მიმდინარე წელს, იტალიის მთავრობის მხარდაჭერით დაიწყება აღნიშნულ სისტემის შექმნაზე მუშაობა, რომელიც, სავარაუდოდ, წლის ბოლოსთვის კონკრეტულ შედეგებს მოგვცემს.
„ინფორმაცია იმის შესახებ, რომ 2017 წელს საქართველოს დედაქალაქში პრობლემურ დამაბინძურებლებს მიწისპირა ოზონი (O3), გოგირდის დიოქსიდი (SO2) და ნახშირჟანგი (CO) წარმოადგენდა, სინამდვილეს არ შეესაბამება. აღნიშნული დამბინძურებელი ნივთიერებების თანამედროვე ავტომატური სადგურებზე უწყვეტი მონიტორინგის მონაცემები ჰაერის ხარისხის ევროპულ სტანდარტებთან მიმართებით ფასდება და არც ერთი მათგანი არც 2017 და არც 2018 წლებში არ აჭარბებდა დადგენილ ნორმას. აღნიშნული უზუსტობები გამოწვეულია მონაცემების დათვლის მეთოდოლოგიაში დაშვებული ცდომილებით“ – განმარტავენ გარემოს დაცვისა და სოფლის მეურნეობის სამინისტროში.
