არასრულწლოვანს თავზე ტომარა ჩამოაფარა და გაიტაცა, მოძალადე დაკავებულია

მარნეულის მოქალაქე, რომელმაც არასრულწლოვანი გოგონა გაიტაცა, დაკავებულია. 22 წლის მამაკაცმა, 18 წლის გოგონა თავზე ტომარა ჩამოცმული გაიტაცა და მისი ცოლად შერთვა სურდა.

როგორც შინაგან საქმეთა სამინისტროში აცხადებენ, დაკავებულს 7-დან 10 წლამდე პატიმრობა ემუქრება.

„შინაგან საქმეთა სამინისტროს ქვემო ქართლის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, 1998 წელს დაბადებული გ. მ. თავისუფლების უკანონო აღკვეთის ბრალდებით დააკავეს. დანაშაული 7-დან 10 წლამდე ვადით თავისუფლების აღკვეთას ითვალისწინებს. გამოძიებით დადგინდა, რომ ბრალდებულმა სამ თანამზრახველთან ერთად, მიმდინარე წლის 14 თებერვალს, ქალაქ მარნეულში, ქორწინების მიზნით, თავისუფლება უკანონოდ აღუკვეთა 2002 წელს დაბადებულ ა.ყ.-ს. და შემთხვევის ადგილიდან ავტომობილით წაიყვანა. სამართალდამცველებმა გ.მ. ინტენსიური სამძებრო და საგამოძიებო მოქმედებების შედეგად, მარნეულის მუნიციპალიტეტში დააკავეს, გოგონა კი საკუთარ სახლში დააბრუნეს“ – აცხადებენ შსს-ში.

გამოძიება წინასწარი შეცნობით არასრულწლოვნისთვის თავისუფლების უკანონო აღკვეთის ფაქტზე, საქართველოს სისხლის სამართლის კოდექსის 143-ე მუხლის მე-3 ნაწილის „დ“ ქვეპუნქტით მიმდინარეობს.

მსგავსი თემები